Հայաստանը ԵԽԽվ-ին առաջարկել է զեկույց պատրաստել՝ Բաքվում Նարիմանյան գերեզմանոցի բարբարոսական ոչնչացման մասին

Հայաստանը ԵԽԽվ-ին առաջարկել է զեկույց պատրաստել՝ Բաքվում Նարիմանյան գերեզմանոցի բարբարոսական ոչնչացման մասին, երկուշաբթի Երևանում լրագրողներին հայտարարեց ԵԽԽՎ հայկական նոր պատվիրակության ղեկավար Դավիթ Հարությունյանը՝ ամփոփելով ԵԽԽՎ աշնանային նստաշրջանի արդյունքները։

Նրա խոսքերով, այդ հարցը վերաբերում է ոչ միայն հայերին, այլև Ադրբեջանի ազգային փոքրամասնություններին։

«Խոսքը վերաբերում է Նարիմանյան գերեզմանոցի բարբարոսական ոչնչացմանը, ինչով ոտնահարվում են Ադրբեջանի ռուսական, հրեական, ուկրաինական և հայկական համայանքների իրավունքները»,- ասաց Հարությունյանը։

Նա տեղեկացրեց, որ նախաձեռնության տակ ստորագրել են Սերբիայի, Ֆրանսիայի, Մեծ Բրիտանիայի, Չեխիայի, Պորտուգալիայի և Ռուսաստանի պատգամավորները։

 «Հարցը քննարկման առարկա կդառնա, որից հետո կպարզվի, թե այս հարցի շուրջ զեկույց պատրաստվելու՞ է, թե՞ ոչ»,- ասաց ԵԽԽՎ-ում Հայաստանի պատվիրակության ղեկավարը։

Բաքվի իշխանությունները որոշել են քանդել Նարիմանյան գերեզմանոցը, որը մոտ 100 տարվա պատմություն ունի և որտեղ թաղված են տարբեր ազգությունների մարդիկ, մեծամասամբ՝ ռուսներ, հայեր և հրեաներ։

Գերեզմանոցը քանդելու պաշտոնական առիթը նոր՝ «քաղաքի երթևեկությանը կենսապես խիստ անհրաժեշտ» ավտոմայրուղու կառուցումն է։

Ադրբեջանում ռուսալեզու հասարակական կազմակերպությունների համակարգող խորհուրդը, Ադրբեջանի ռուսական և ուկրաինական համայնքները, «Սոդրուժեստվո» կազմակերպությունը նախօրեին երկրի ղեկավար Իլհամ Ալիևեին ուղերձ են հղել, որով, մասնավորապես, խնդրել են «կանգնեցնել վանդալիզմով զբաղվող և մեր հարազատների գերեզմանոցների և աճյունների նկատմամբ անարգանք ցուցաբերող պաշտոնյաներին»։ --0—