ԵՐԵՎԱՆ, 3 հոկտեմբերի./Նովոստի-Արմենիա/. Հայաստանի և Սոչիի բժիշկների միջև նախատեսվում է սերտ համագործակցություն՝ առողջապահության մի շարք ուղղություններում։
Ինչպես չորեքշաբթի Երևանում՝ առաջատար հայ բժիշկների և Սոչիից ժամանած պատվիրակության մասնակցությամբ կլոր սեղանի ընթացքում լրագրողներին հայտարարեց ՀՀ առողջապահության նախարար Հարություն Քուշկյանը, կողմերը ցանկություն են հայտնել՝ ծանոթանալ առողջապահության ոլորտի խնդիրներին և պրոբլեմներին։
«Մեր առջև Հայաստանի առողջապահական համակարգն ամրացնելու առաջնահերթ նպատակ ունենք, այն ավելի հասանելի մակարդակի բարձրացնելու և բժշկական սպասարկման որակը բարձրացնելու»,- ասաց նա։
Քուշկյանի խոսքերով, Սոչիի գործընկերների հետ նախատեսվում է սերտ համագործակցություն հաստատել՝ սիրտ-անոթային հիվանդությունների գծով։
«Բացի այդ, նրանց հետաքրքրում է սպորտային բժշկության ոլորտը, ինչը պայմանավորված է 2014թ. Սոչիում անցկացվելիք XX օլիմպիական խաղերով, և քանի որ մարզական վնասվածքները որոշակի յուրահատկություն ունեն, մենք մտադիր ենք նրանց հետ կիսել մեր փորձն այս ոլորտում»,- պարզաբանեց նա։
Այս կապակցությամբ Սոչիի առողջապահության վարչության պետ Յուրի Միտինը նշեց, որ հաշվի առնելով Սոչիի բնակչության կտրուկ աճը օլիմպիադայի նախաշեմին՝ քաղաքի բժիշկների առջև խնդիր է առաջացել՝ վերանայել հիվանդանոցի տեղերի կառուցվածքի վերափոխումը, ժամանածներին պատշաճ մակարդակի բժշկական օգնություն ցուցաբերելու համար կոնկրետ պայմանների ստեղծումը՝ դրա հետ մեկտեղ՝ պահպանելով Սոչիի բնակիչներին ցուցաբերվող բժշկական օգնության որակը։
Իր հերթին ՀՀ առողջապահության նախարարության բժշկական վարչության մայրության և մանկության բաժանմունքի պետ Գայանե Սարիբեկյանը հույս հայտնեց, որ Սոչիի բժիշկների պատվիրակության երևանյան այցից հետո հնարավոր կլինի գտնել համագործակցության դաշտ, մասնավորապես, մանկական վերականգնողականության, պերինատոլոգիայի և վերարտադրողականության ոլորտներում, ինչպես նաև մանկական ուռոլոգիայի և սրտային վիրաբուժության ոլորտներում։
«Ես կարծում եմ, որ փորձի, ծրագրերի, նպատակային արդյունքների, ինչպես նաև բժշկական տեղեկատվության և վիճակագրական տվյալների փոխանակումը շատ օգտակար կլինի ինչպես Հայաստանի բժիշկների, այնպես էլ Սոչիի մասնագետների համար»,- ասաց նա։
Կլոր սեղանի ավարտին Սոչիի քաղաքապետարանի և ՀՀ առողջապահության նախարարության միջև Համագործակցության մասին հուշագիր ստորագրվեց։
Հայաստանում սեպտեմբերի 30-ից հոկտեմբերի 4-ը գտնվող Սոչիի քաղաքապետարանի պատվիրակության կազմում ընդգրկված են, մասնավորապես, Սոչիի փոխքաղաքապետ Իրինա Բադայանը, Սոչիի քաղաքապետարանի միջազգային հարաբերությունների վարչության պետ Տ. Պուստովիտը, ինչպես նաև Սոչիի քաղաքային մի շարք հիվանդանոցների գլխավոր բժիշկներ և Քաղաքային ժողովի պատգամավորներ։ --0—
