482.26
+0.64
516.89
-1.62
7.57
+0.02
-4
Եղանակը Երևանում
Հայ
ԱՄՆ Կոնգրեսի կողմից Հայոց ցեղասպանության բանաձևի ընդունումը չի կարող վնասել միջպետական հարաբերություններին. ՀՀ ԱԳՆ
19:23
01 Հոկտեմբերի 2007

ԵՐԵՎԱՆ, 1 հոկտեմբերի./Նովոստի-Արմենիա/. ԱՄՆ Կոնգրեսի կողմից Հայոց ցեղասպանության մասին 106-րդ բանաձևի ընդունումը չի կարող վնասել միջպետական հարաբերություններին, ասվում է «Նովոստի-Արմենիային» տրամադրված՝ ՀՀ ԱԳ նախարար Վարդան Օսկանյանի նամակում՝ ուղղված ԱՄՆ Կոնգրեսի Ներկայացուցիչների պալատի խոսնակ Նենսի Փըլոսիին։

«Մարդու իրավունքներին և ցեղասպանության հարցերին վերաբերող բանաձևը չի կարող վնասել հայ-թուրքական կամ թուրք-ամերիկյան հարաբերություններին»,- նամակում նշել է Օսկանյանը՝ մեկնաբանելով ԱՄՆ նախկին պետքարտուղարների կոչը՝ Հայոց ցեղասպանության մասին 106-րդ բանաձևը ԱՄՆ Կոնգրեսի քննարկմանը չդնելու վերաբերյալ։

«Ճշմարտության ճանաչումը քաղաքական հարաբերությունների համար խոչընդոտ դիտարկելը ցինիզմ է»,- ընդգծել է ՀՀ ԱԳ նախարարը։

Նախարարը նշել է, որ ինքը չի միջամտել  բանաձևի քննարկման գործընթացին, քանի որ համարում էր, որ բանաձևի բովանդակությունը և նպատակները վերաբերում են միայն Ներկայացուցիչների պալատին և ամերիկացի ընտրողներին։

«Մեզ համար այս բանաձևում չկա պատմականորեն ոչ ճիշտ որևէ փաստ  կամ որևէ բան, որը վտանգի որևէ այլ երկրի շահերը»,- նշել է Օսկանյանը։

Նրա խոսքերով, ԱՄՆ նախկին ութ պետքարտուղարների՝ Նենսի Փըլոսիին հասցեագրված նամակը քննարկումների բնույթը փոխելու քայլ է։

«Այս նամակն անդրադառնում է այնպիսի գործընթացների, որոնք վերաբերում են Հայաստանի Հանրապետությանը, և հենց այդ պատճառով ես կուզենայի առիթն օգտագործել` կիսելու իմ մտահոգություններն ու խոհերը»,- նշել է ԱԳ նախարարը։

Օսկանյանի խոսքերով, վրդովմունք են առաջացնում նամակում պարունակվող այն պնդումները, թե իբր բանաձևը կարող է վնասել հայ-թուրքական հարաբերություններին։

Նա ցավ է հայտնել, որ ութ փորձառու դիվանագետներ տեղիք են տվել թուրքական մեքենայություններին։

«Ես ափսոսանքով պիտի նշեմ, որ որևէ գործընթաց, որը կխթաներ Հայաստանի և Թուրքիայի միջև հարաբերությունների կարգավորմանը, գոյություն չունի: Մտահոգություններ հայտնել գոյություն չունեցող գործընթացը վնասելու առումով` նվազագույնը շինծու կեցվածք է»,- կարծում է Օսկանյանը։

Դեռ ավելին, նա նշել է, որ որևէ հույս չկա, որ Թուրքիան լրջորեն կներգրավվի որևէ գործընթացում, որը կխոստանար նվազագույն նորմալ հարաբերությունների հասնելու հնարավորություն:

ՀՀ ԱԳ նախարարն ընդգծել է, որ իր վատատեսությունը հիմնվում է մի փաստի վրա, որ ամեն անգամ, երբ հայկական կողմը համաձայնում է հանդիպել թուրք գործընկերների հետ, ապա հենց հանդիպում ունենալու հանգամանքը Թուրքիայի կողմից օգտագործվում է ԱՄՆ-ում կամ այլ երկրներում ցեղասպանության ճանաչման գործընթացները տապալելու համար:

«Մինչդեռ հանդիպումն ինքնին որևէ նոր դուռ չի բացում, չի ունենում համարժեք հետևանքներ և բացի «հանդիպում` հանուն հանդիպման» լինելուց, որևէ առաջընթաց չի գրանցում: Սա մեզ վրդովեցնում է, սակայն անհետևանք է մնում Թուրքիայի ղեկավարության համար»,- ասել է  Օսկանյանը։

Նրա խոսքերով, այս անգամ էլ հայկական կողմը համաձայնեց հանդիպել Թուրքիայի նորընտիր արտգործնախարար Ալի Բաբաջանի հետ Նյու Յորքում` լավ գիտակցելով իր պարտականությունը՝ օգտագործել յուրաքանչյուր առիթ՝ հարաբերությունները բարելավելու համար:

«Նախքան անգամ այդ հանդիպման տեղի ունենալն արդեն պնդումներ են հնչում, որ այդ դեռևս չկայացած հանդիպումը մի ինչ-որ գործընթացի մաս է, որը կարող է վտանգվել»,- ասել է Օսկանյանը:

Նրա խոսքերով, Հայաստանը մշտապես պատրաստ է Թուրքիա-Հայաստան հարաբերությունների նորմալացմանը, «այնուհանդերձ, Հայաստանի կողմից նորմալացման հանգեցնող յուրաքանչյուր նախաձեռնություն արժանացել է Թուրքիայի մերժմանը»:

«Թուրքիան առաջարկներ է ներկայացնում, որոնք պարզապես անվերջ բանակցությունների հայտ են` առանց հարևանների միջև սովորական հարաբերությունների հասնելու լուրջ հանձնառությունների: Անգամ պատմական հանձնաժողով կազմելու իրենց կոչը` քննարկելու այդ ցավոտ պատմական իրադարձությունները, լուրջ չէ` հաշվի առնելով ազատ խոսքի և քննարկման վրա դրված սահմանափակումներն իրենց քրեական հետևանքներով և այն ոչ բարեկամական մթնոլորտը, որ Թուրքիան է ստեղծել` Հայաստանի հետ սահմանները փակ պահելով»,- կարծում է Օսկանյանը:

ԱՄՆ նախկին ութ պետքարտուղարներ Մադլեն Օլբրայթը, Ջեյմս Բեյքերը, Ուորեն Քրիստոֆերը, Լորենս Իգլբերգերը, Ալեքսանդր Հայգը, Հենրի Քիսենջերը, Քոլին Փաուելը և Ջորջ Շուլցը դիմել են Նենսի Փըլոսիին՝ պահանջելով Ներկայացուցիչների պալատի քվեարկությանը չդնել Հայոց ցեղասպանության ճանաչումը նախատեսող 106-րդ բանաձևը։

Նրանց կարծիքով, այս հարցը քննարկման դնելը անհնարին կդարձնի  Թուրքիայի և Հայաստանի հաշտությունը, դա կփչացնի ԱՄՆ-ի հարաբերությունները պաշտոնական Անկարայի հետ, կհարվածի ԱՄՆ-ի միջազգային և ազգային շահերին, ինչպես նաև Իրաքում և Աֆղանստանում ռազմական գործողությունների իրականացման  սպառանլիք կստեղծի։

Հայերի ցեղասպանության մասին 106-րդ բանաձևը ԱՄՆ Ներկայացուցիչների պալատ էր ներկայացվել 2007թ. հունվարի 30-ին։ Այդ բանաձևը կոչվում է «Պալատի բանաձև» (House resolution), և դրա ընդունման համար պարտադիր չէ Սենատի հավանությունն ու նախագահի ստորագրությունը։

Բանաձևը ԱՄՆ նախագահին կոչ է անում ճիշտ արտացոլել և ներկայացնել մարդու իավունքներին, էթնիկ զտումներին, ցեղասպանությանը, և, մասնավորապես, Հայոց Ցեղասպանությանը (որը հավաստող փաստաթղթեր կան ԱՄՆ արխիվներում) վերաբերող հարցերը։

Հայոց Մեծ եղեռնը 20-րդ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի ջարդը և շատ ցավագին է ընդունում Արևմուտքի քննադատությունը Հայոց ցեղասպանության հարցի վերաբերյալ։

1915-1923թթ. Օսմանյան Թուրքիայում իրագործված Հայոց ցեղասպանության փաստը ընդունվել է աշխարհի շատ երկրների, ինչպես նաև ԱՄՆ 40 նահագների կողմից։ --0—

Loading...
Թեմատիկ նյութեր
Բաժնի այլ նյութեր
16:51
07 Դեկտեմբերի 2016
Ֆրանսիայի ՆԳՆ նոր ղեկավարն Արցախի բարեկամն է և ընդգրկված է Ադրբեջանի «սև ցուցակներում»
Ֆրանսիայի ներքին գործերի նախարար Բրունո Լը Ռուն ներառված է ադրբեջանական արտաքին գերատեսչության «սև ցուցակում»:
11:52
07 Դեկտեմբերի 2016
«Դաշնակցությունը» ընտրություններից հետո հնարավոր է միանա իշխող ՀՀԿ-ին
ՀՅԴ-ն չի բացառում, որ ևս մաս կազմի իշխանական դաշինքին:
11:37
06 Դեկտեմբերի 2016
Չի բացառվում Դալլաքյան–Ծառուկյան քաղաքական տանդեմը
Չի բացառվում, որ Վիկտոր Դալլաքյանը միանալ Գագիկ Ծառուկյանի ստեղծելիք դաշինքին:
18:23
05 Դեկտեմբերի 2016
Քաղաքագետը պատմել է նախընտրական արշավի ընթացքում ՀՀԿ-ի ռազմավարության մասին
Հայաստանի հանրապետական կուսակցությունն արդեն սկսված նախընտրական արշավում ընդունել է երեք բաղկացուցիչներից կազմված ռազմավարություն:
16:02
05 Դեկտեմբերի 2016
ՀՀ ԱԺ խոսնակը սխալմամբ «կողմ» է քվեարկել ժողովրդի ապստամբության իրավունքին
ՀՀ ԱԺ խոսնակ Գալուստ Սահակյանը սխալմամբ «կողմ» է քվեարկել «Ժառանգության» պատգամավոր Զարուհի Փոստանջյանի «Ժողովրդի ապստամբության իրավունքի մասին» օրենքը ԱԺ քառօրյայի օրակարգում ավելացնելուն։
15:07
05 Դեկտեմբերի 2016
Գագիկ Ծառուկյանը վերադառնում է մեծ քաղաքականություն` որպես ընդդիմադիր գործիչ
«Բարգավաճ Հայաստան» կուսակցության հիմնադիր Գագիկ Ծառուկյանը, հազարավոր քաղաքացիների պահանջով, վերադառնում է ակտիվ քաղաքականություն, երկուշաբթի լրագրողներին ասաց «Բարգավաճ Հայաստան» խորհրդարանական խմբակցության ղեկավար Նաիրա Զոհրաբյանը։
15:40
03 Դեկտեմբերի 2016
ԲՀԿ քաղխորհուրդը խնդրում է Ծառուկյանին վերադառնալ ակտիվ քաղաքականություն
Շաբաթ օրը կայացած ԲՀԿ քաղաքական խորհրդի ընդլայնված նիստում քննարկվել է ԲՀԿ հիմնադիր նախագահ Գագիկ Ծառուկյանի ակտիվ քաղաքականություն վերադառնալու հարցը:
12:34
03 Դեկտեմբերի 2016
ՀՀ նախագահ Սերժ Սարգսյանն ու ԱՄՆ նորընտիր փոխնախագահ Մայք Փենսը հեռախոսազրույց են ունեցել
Հեռախոսազրույցը կայացել է ամերիկյան կողմի նախաձեռնությամբ:
19:55
02 Դեկտեմբերի 2016
Հայ–ռուսական զորախմբի ստեղծումը բխում է Հայաստանի շահերից. պաշտպանության նախկին նախարար
Հայաստանի և Ռուսաստանի Զինված ուժերի միավորված զորախմբի ստեղծումը բխում է Հայաստանի շահերից, ուրբաթ լրագրողներին հայտարարեց ՀՀ պաշտպանության նախկին նախարար Վաղարշակ Հարությունյանը։
17:18
02 Դեկտեմբերի 2016
Ադրբեջանի հետ սահմանագծում լարվածություն չկա. ՀՀ ՊՆ
Հայ-ադրբեջանական սահմանագծում և ղարաբաղա-ադրբեջանական շփման գծում իրավիճակը հանգիստ է, ասաց ՀՀ ՊՆ մամուլի քարտուղար Արծրուն Հովհաննիսյանը:
11:43
02 Դեկտեմբերի 2016
Րաֆֆի Հովհաննիսյանի որոշումը վտանգում է «Ժառանգություն» կուսակցության գոյությունը
Րաֆֆի Հովհաննիսյանը սպասում է քաղաքական դաշտում կատարվելիք փոփոխություններին:
17:22
01 Դեկտեմբերի 2016
Պուտինի ուղերձը. ի՞նչ օգուտ կարող է քաղել իր համար Հայաստանը
Այս տարի ՌԴ նախագահի` Դաշնային ժողովին ուղղված ուղերձը մի շարք առումներով անսովոր էր: