Թբիլիսիում ցուցարարները գրոհում են խորհրդարանի շենքը (ՎԻԴԵՈ)

ԵՐԵՎԱՆ, 21 հունիսի./Նովոստի–Արմենիա/. Թբիլիսիում հանրահավաքի մասնակիցները, ովքեր պահանջում են խորհրդարանի խոսնակ Իրակլի Կոբախիձեի հրաժարականն ու արտահերթ խորհրդարանական ընտրությունների անցկացում, սկսել են գրոհել խորհրդարանի շենքը։ Ոստիկանությունը փորձում է զսպել ցուցարարներին, հաղորդում է «Կոմերսանտը»։

Հանրահավաքին մասնակցում է մոտ 10 հազար մարդ։ Խորհրդարանի շենքի մոտ է տեղակայվել հատուկ նշանակության ջոկատն ու հատուկ տեխնիկան, հաղորդում է «Ինտերֆաքսը»` հղում անելով վրացական ԶԼՄ–ներին։ Հատուկ միջոցներ դեռ չեն կիրառվում։

«Նովայա գազետայի» տեղեկատվության համաձայն, մոտ 100 ցուցարար հավաքվել է Ռուսաստանի հյուպատոսության շենքի մոտ։ Նրանք բղավում են «Ռուսաստանն օկուպանտ է»։

Վրաստանի ՆԳՆ–ն կոչ է արել ցուցարարներին «անհապաղ դադարեցնել օրենքի խախտումն ու բռնությունը» և հեռանալ խորհրդարանի տարածքից։

«Հակառակ դեպքում ոստիկանությունը կձեռնարկի օրենքով նախատեսված միջոցառումներ», – նշվում է նախարարության հաղորդագրության մեջ։

ՆԳ նախարար Գեորգի Գախարիան հայտարարել է լրագրողերին, որ պատրաստ է հրաժարական տալ. «Խնդիր չկա, ես հրաժարական կտամ, եթե լինի նման անհրաժեշտություն»։

Հանրահավաքի պատճառը նախօրեին` հունիսի 20–ին, Ուղղափառության միջխորհրդանական վեհաժողովի նիստի ժամանակ գրանցված միջադեպն է։ Վեհաժողովի նախագահը ՌԴ Պետդումայի անդամ Սերգեյ Գավրիլովն է։ Վեհաժողովի բյուրոյի հետ վրացի կազմակերպիչների նախնական պայմանավորվածության համաձայն, նիստը պետք է վարեր կազմակերպության քարտուղարներից մեկը, սակայն անսպասելիորեն Վրաստանի խորհրդարանի խոսնակի աթոռը զբաղեցնում է Սերգեյ Գավրիլովը։ Նա ռուսերեն դիմում է հավաքվածներին։

«Եվրոպական Վրաստան» կուսակցության ընդդիմադիրների կարծիքով, Սերգեյ Գավրիլովի նախագահությունը թբիլիսյան վեհաժողովում վիրավորական է։ Ընդմիջման ժամանակ ընդդիմադիրները զբաղեցնում են նախագահության ողջ տարածքն ու թույլ չեն տալիս պարոն Գավրիլովին կրկին նստել աթոռին։ Վեհաժողովի նիստը դադարեցվում է անորոշ ժամանակով։ Մոսկվայի ժամանակով ժամը 19։00–ին Սերգեյ Գավրիլովն ու Պետդումայի մյուս պատգամավորները վերադառնում են Թբիլիսիից։–0–