ՀՀ–ում ՌԴ դեսպանը կոչ է արել չքաղաքականացնել հատուկջոկատային Բելյանկինի սպանությունը (ՎԻԴԵՈ)

ԵՐԵՎԱՆ, 11 հունիսի./Նովոստի–Արմենիա/. ՀՀ–ում ՌԴ արտակարգ և լիազոր դեսպան Սերգեյ Կոպիրկինը մեկնաբանել է ռուս հատուկջոկատային Նիկիտա Բելյանկինի սպանության շուրջ ստեղծված իրավիճակն ու դրա հնարավոր ազդեցությունը Հայաստանի և Ռուսաստանի հարաբերությունների վրա։

Հունիսի 2–ի գիշերը Մերձմոսկվայում սրճարաններից մեկի մոտ տեղի է ունեցել զանգվածային վեճ։ Նախկին հատուկջոկատային Նիկիտա Բելյանկինը սպանվել է` փորձելով բաժանել վեճի մասնակիցներին, ևս մի տղամարդ վիրավորվել է։ Քննչական կոմիտեն հարուցել է քրեական գործ։ Ձերբակալվել է չորս մարդ, որոնցից երեքը, այդ թվում` սպանության մեջ մեղադրվող Սերգեյ Խոջանյանն արդեն կալանավորվել են։ Նախկին հատուկջոկատային Նիկիտա Բելյանկինի սպանության գործով որպես դերակատարներ անցնում են ՌԴ քաղաքացիներ Սերգեյ Խոջանյանը, Ռուդիկ Մանուկյանը, Արթուր Հակոբյանը, Դավիթ Եղիազարյանն ու Սուրեն Մարկոսյանը, ինչպես նաև ՀՀ քաղաքացիներ Նարեկ Ստեփանյանը, Համլետ Հայրապետյանն ու Սահակ Սահակյանը, որոնց մեղսագրվում է խուլիգանություն։ Նրանք իրենց մեղքը չեն ճանաչում։

«Ինչ վերաբերում է նմանատիպ ողբերգական իրադարձությունների նկատմամբ մոտեցմանը, ապա կարծում եմ, որ երկու կողմն էլ հասկանում են, որ մեր հարաբերություններում կարող է շատ բան տեղի ունենալ, մենք բոլորս մարդիկ եք։ Սակայն կա առանցք, որը սահմանում է այդ հարաբերություններն արդեն դարեր շարունակ և հիմա։ Մեր խնդիրն է, որպեսզի թեկուզ նմանատիպ ողբերգական, սակայն ընթացիկ իրադարձությունները  չքաղաքականացվեն, թույլ չտրվի, որպեսզի դա գոնե ինչ–որ ձևով վնասի այն ամենակարևոր երևույթներին, որոնք մեզ միավորում են», – հայտարարեց Կոպիրկինը երեքշաբթի ասուլիսի ժամանակ։

Նա նաև նշեց, որ իրենց մեկնաբանություններում ռուսական և հայկական ղեկավարությունը շատ զգույշ են այս հարցով` «քաղաքական լարված արտահայտություններ և մեկնաբանություններ» թույլ չտալու համար։

«Աշխատում են քննչական մարմինները, որոնք իրազեկում են իրենց աշխատանքի մասին, և դա, իմ կարծիքով, բավարար է», – ասաց ՌԴ դեսպանն` ընդգծելով, որ այս հարցով Հայաստանի և Ռուսաստանի ղեկավարությունների դիրքորոշումը շատ հստակ է. նմանատիպ ողբերգական միջադեպերը պետք է քննվեն իրավասու մարմինների կողմից, մեղավորները պետք է պատժվեն, սակայն դրանք չպետք է առնչվեն պետությունների, եղբայրական ժողովուրդների միջև հարաբերություններին։–0–