ԵՐԵՎԱՆ, 25 ապրիլի./Նովոստի–Արմենիա/. Ֆրանսիայի Եվրոպայի և արտաքին գործերի նախարար Քեթրին Կոլոնան ապրիլի 26–ից 28–ը կայցելի Հայաստան, Ադրբեջան և Վրաստան։
«Այցի նպատակն է ցույց տալ, որ Ֆրանսիան հետամուտ է երկու երկրների միջև բանակցությունների աջակցությանը` արդար և ամուր խաղաղության հասնելու համար տարածքային ամբողջականության և միջազգային իրավունքի սկզբունքների պահպանմամբ։ Նա նաև կպահանջի երաշխավորել Լեռնային Ղարաբաղի հայ բնակչության իրավունքները և անհապաղ վերականգնել երթևեկությունը Լաչինի միջանցքով», – նշվում է Ֆրանսիայի ԱԳՆ–ի կայքում հրապարակված հաղորդագրության մեջ։
Բաքվում նա կհանդիպի Ադրբեջանի նախագահի և ԱԳ նախարարի հետ։
Երևանում Կոլոնան կհանդիպի ՀՀ վարչապետ Նիկոլ Փաշինյանի և ԱԳ նախարար Արարատ Միրզոյանի հետ, կայցելի Ջերմուկում գտնվող ԵՄ Դիտորդական առաքելության կենտրոնակայան և Ծիծեռնակաբերդի հուշահամալիր։
Երևանից հետո Ֆրանսիայի ԱԳ նախարարը կմեկնի Վրաստան, որտեղ նախագահ Սալոմե Զուրաբաշվիլու, վարչապետ Իրակլի Ղարիբաշվիլու և ԱԳ նախարար Իլյա Դարչիաշվիլու հետ բանակցությունների ընթացքում կհաստատի իր աջակցությունը օրենքի գերակայության ոլորտում իրականացվող բարեփոխումներին, որոնք անհրաժեշտ են ԵՄ–ի հետ Վրաստանի մերձեցումը շարունակելու համար։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
