ԵՐԵՎԱՆ, 11 հունվարի./Նովոստի–Արմենիա/. Ղազախստանի նախագահ Կասիմ–Ժոմարդ Տոկաևը հայտարարել է, որ ՀԱՊԿ խաղաղապահ զորակազմի դուրսբերումը կսկսվի երկու օրից։
«Հակաահաբեկչական օպերացիայի սուր փուլն ընդհանուր առմամբ անցել է։ Իրավիճակը բոլոր շրջաններում կայուն է։ Այդ կապակցությամբ հայտարարում եմ, որ ՀԱՊԿ խաղաղապահ ուժերի հիմնական առաքելությունը հաջողությամբ ավարտված է։ Երկու օրից կսկսվի ՀԱՊԿ միավորված խաղաղապահ զորակազմի աստիճանական դուրսբերումը։ Զորակազմի դուրսբերման գործընթացը կտևի 10 օրից ոչ ավել», – նշել է Տոկաևը` երեքշաբթի ելույթ ունենալով Ղազախստանի խորհրդարանի ստորին պալատում, հաղորդում է
ՏԱՍՍ–ը։
Տոկաևի խոսքով, երկրի հասարակության համախմբումը մեթոդիկորեն խախտում էին, Ազգային անվտանգության կոմիտեն չնկատեց սպառնալիքը։
«Մեր հասարակության համախմբումը մեթոդիկորեն խախտում էին, այդ թվում` բողոքի ակցիաների միջոցով, պրոֆեսիոնալ մշակված սցենարի համաձայն։ Գաղտնի ընթանում էր արմատական գործողություններ կատարողների նախապատրաստումը։ Ազգային անվտանգության կոմիտեն, որպես լիազոր մարմին, չկարողացավ և չցանկացավ հստակ գնահատական տալ այդ քայքայիչ աշխատանքին, չնկատեց ծայրահեղ սպառնալիքը ազգային անվտանգության նկատմամբ», – ասել է Տոկաևը։–0–