ԵՐԵՎԱՆ, 15 մարտի. /Նովոստի-Արմենիա/. Ռուսաստանը մեկ անգամ չէ, որ մտահոգություն է հայտնել Ադրբեջան այցելող Ռուսաստանի հայազգի քաղաքացիների նկատմամբ էթնիկ հատկանիշների պատճառով խտրական գործողությունների կապակցությամբ, սակայն պատասխաններ չեն ստացվել։
Այդ մասին ուրբաթ լրագրողների հետ ճեպազրույցում հայատարարել է ՌԴ ԱԳՆ պաշտոնական ներկայացուցիչ Մարիա Զախարովան:
Օրերս ՌԴ ԱԳՆ-ն հանդես է եկել հայտարարությամբ` Ադրբեջան ժամանող հայազգի ՌԴ քաղաքացիների վերաբերյալ: Նշվել է, մասնավորապես, որ ղարաբաղյան հակամարտության չկարգավորված լինելու պատրվակով Ադրբեջանի սահմանապահ ծառայությունը շարունակում է թույլ չտալ մուտքն իրենց երկրի տարածք այն անձանց, որոնք անկախ քաղաքացիությունից ունեն հայ ազգի պատկանելիության ուղղակի կամ անուղղակի հատկանիշներ։
«Հայտարարության պաշտոնական պատասխանի մասին ինձ հայտնի չէ: Սակայն եղել են նաև «ոչ պաշտոնական» պատասխաններ: Մամուլում մեկնաբանություններ, հարցազրույցներ և հայտարարություններ եմ տեսել, որ իբր նմանատիպ խնդիր գոյոթյուն ունի նաև ադրբեջանական ծագմամբ ՌԴ քաղաքացիների համար Հայաստան մուտք գործելու դեպքում», - ասել է Զախարովան:
Նա նշել է, որ առավոտյան անձամբ կարդացել է հայտնի ադրբեջանցի գործչի հարցազրույցը, ով մեղադրում է Ռուսաստանին նման դեպքերով չզբաղվելու համար, և զարմացած է:
«Ինձ հայտնի չէ նման դեպքերի մասին: Սակայն անկախ երկրից կամ տարածաշրջանից` մենք արձագանքում ենք այն բոլոր դեպքերին, որոնք կապված են մեր քաղաքացիների իրավունքների ճնշման հետ», - ասել է նա:
Այս համատեքստում Զախարովան կոչ է արել դիմել ՌԴ ԱԳՆ` ադրբեջանական արմատներ ունեցող ՌԴ քաղաքացիների` Հայաստանի մուտքի արգելքի դեպքում:
«Եթե նման դեպքեր տեղի են ունենում ՌԴ քաղաքացիների կողմից Հայաստանի սահմանը հատելու դեպքում, ապա մենք շատ շնորհակալ կլինենք նման տեղեկության համար, որտեղ կնշվի դեպքի ամսաթիվը, վայրը, չվերթի համարը կամ այլ հաստատող նյութեր: Սակայն այսօրվա դրությամբ նման նյութեր չկան: Եթե որևէ մեկբ ունի նման ապացույցներ, խնդրում ենք կիսվել մեզ հետ, որպեսզի մամուլում չլինեն նմանատիպ չհաստատված հայտարարություններ»,- ասել է Զախարովան:
Մոտ երկու ամիս առաջ ՌԴ ԱԳՆ պաշտոնական ներկայացուցիչ Մարիա Զախարովան անընդունելի համարեց Ադրբեջանում հայկական ծագմամբ ՌԴ քաղաքացիների նկատմամբ խտրականությունը։ Դրան ի պատասխան` Բաքուն Զախարովայի հայտարարությունը գնահատեց որպես «հակասող երկկողմ ռազմավարական հարաբերությունների ոգուն»։–0–
