ԵՐԵՎԱՆ, 2 դեկտեմբերի. /Նովոստի–Արմենիա/. Հայաստանի և Ռուսաստանի Զինված ուժերի միավորված զորախմբի ստեղծումը բխում է Հայաստանի շահերից, ուրբաթ լրագրողներին հայտարարեց ՀՀ պաշտպանության նախկին նախարար Վաղարշակ Հարությունյանը։
«Ռուսաստանը չի ավելացնում իր ազդեցությունը, այդ երկրի ունեցած ազդեցությունը բխում է մեր շահերից։ Իսկ մենք դրանով լուծում ենք մեր անվտանգության խնդիրները։ Եթե չկա անվտանգություն, չի կարող լինել նաև տնտեսություն։ Ո՞վ կգա Հայաստան բիզնեսով զբաղվելու, եթե այստեղ անվտանգ չլինի», – հայտարարեց Հարությունյանը։
Մեկնաբանելով միավորված զորախմբի ստեղծման կապակցությամբ տեղ գտած ոչ միանշանակ կարծիքները` Հարությունյանն ընդգծեց, որ հայ–ռուսական հարաբերությունների դեմ ուղղված ամեն ինչ ձեռնտու է միայն Ադրբեջանին և Թուրքիային։
«...Ադրբեջանը միշտ ասում է, որ իր հետ Ռուսաստանը կունենա մեծ ազդեցություն Կովկասում։ Նրանք մշտապես աշխատում են այդ ուղղությամբ, և պետք չէ նրանց այդ հարցում օգնել», – ասաց Հարությունյանը։
Նա նաև ավելացրեց, որ հայ–ռուսական միավորված զորախումբը որևէ սպառնալիք չի ներկայացնում երրորդ երկրների համար։
«Համաձայնագրում հստակ ամրագրված է, որ զորախումբը գործելու է ռուսական ռազմաբազայի և 1997 թ.–ին ստորագրված հայ–ռուսական համաձայնագրի շրջանակում, որտեղ նշված է, որ այս ամենը գործում է միայն Հայաստանի դեմ ուղղված ագրեսիայի ժամանակ։ Սիրիայի կամ հարևան Վրաստանի դեմ զորախմբի գործողությունների մասին խոսք լինել անգամ չի կարող», – ասաց Հարությունյանը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում