ԵՐԵՎԱՆ, 24 նոյեմբերի./Նովոստի–Արմենիա/. Օրերս հայտնի դարձավ Ադրբեջանին բելառուսական ռազմատեխնիկայի հերթական խմբաքանակի մատակարարման նոր պայմանագրի կնքման մասին։
Ինչպես գրում է բելառուսական
42.tut.by պարբերականը, դա հանգեցրեց ՀՀ վարչապետի պաշտոնակատար Նիկոլ Փաշինյանի բացասական արձագանքի, ով նշեց, որ Բաքվին զենքի մատակարարումը հակասում է ՀԱՊԿ–ի էությանը։
42.tut.by–ն անդրադարձել է այն թեմային, թե որքան տեխնիկա է Բելառուսը մատակարարել Ադրբեջանին և ինչ քանակությամբ։
Ըստ պարբերականի, Բելառուսի և Ադրբեջանի միջև զենքի վաճառքն իրականացվում է արդեն երկար տարիներ։ Զենքի մատակարարման գործարքները, պայմանագրերի գումարներն ու ծավալները հաճախ գաղտնի են պահվում։
«Ոչ պաշտոնական տվյալներով, 10 տարվա համագործակցության ընթացքում Մինսկը վաճառել է մոտ 500 մլն դոլարի զենք և ռազմական նշանակության տեխնիկա ու սարքավորումներ», – նշում է պարբերականը։
Ըստ աղբյուրի, միջազգային գործարքների մասին տվյալների մի մասը հասանելի է ՄԱԿ–ի զինաթափման հարցերով վարչության կայքում, որոնք էլ պարբերականը ներկայացնում է։
Տանկերի բրիգադ
2005 թ.–ին Բաքուն Մինսկից ստացել է Т-72 տեսակի 19 տանկ, 2006 թ.–ին` 41 տանկ, 2012թ.–ին` ևս 62 տանկ։ Հետագա տարիների ընթացքում տեխնիկայի մատակարարման մասին պաշտոնական տվյալներ չկան։ Ըստ պարբերականի, ԱՊԱ ադրբեջանական լրատվական գործակալության տվյալներով, Բելառուսն Ադրբեջանին է մատակարարել Т-72 տիպի 153 տանկ։ Դա մի ողջ տանկային բրիգադ է։
Դիվիզիոանական ծանր հրետանի
2008 և 2009 թթ.–ին Բելառուսն Ադրբեջանին է վաճառել «Պիոն» տեսակի 12 ինքնագնաց հրետանային հրանոթներ։ Դա մի ողջ դիվիզիոն է։
Ավելի քան 6 դիվիզիոն հաուբիցներ
2009 և 2012 թթ.–ին Բելառուսը երկու փուլով Ադրբեջանին է մատակարարել Д-30 տեսակի 120 հաուբիցներ։
Գրոհիչների Էսկադրիլիա
2009–2012 թթ.–ին մատակարարվել է Սու–25 տեսակի 11 գրոհիչ։
Զենիթային համալիրներ
2007 թ.–ին կնքվեց ադրբեջանական զենիթահրթիռային համալիրների արդիականացման պայմանագիր։ Արդիականացմամբ զբաղվեցին «Տետրաէդր» բելառուսական ձեռնարկության մասնագետները և ավարտեցին 3 տարում։ Արդիականացման արդյունքում զենիթահրթիռային համալիրների շահագործման ժամկետը երկարացվեց 15 տարով։ Ադրբեջանին մատակարարվեցին նաև «Բուկ–ՄԲ» տեսակի զենիթահրթիռային համալիրներ։
Զենքի համաշխարհային վաճառքի վերլուծության կենտրոնի տվյալներով, 2014թ.–ին Ադրբեջանը ստացել է «Պեչորա–2Տ» տեսակի 9 դիվիզիոն (27 կայանքներ), որը պատվիրել էր Բելառուսում 2011 թ.–ին։ Հակաօդային պաշտպանության համակարգերի ամենաժամանակակից ձեռքբերումներից մեկը դարձավ «Ստիլետ» Տ38 տեսակի զենիթահրթիռային համալիրների երկու մարտկոցների գնումը։
Հրթիռային համալիրներ
Այս պահին հայտնի է, որ Բելառուսն Ադրբեջանին է մատակարարում «Պոլոնեզ» տեսակի 10 հրթիռային համալիր։ Աղբյուրը նշում է, որ այս համալիրի մասին տեղեկատվության մեծ մասը դեռ գաղտնի է պահվում։
«Սա Բելառուսի կողմից Ադրբեջանին մատակարարվող զենքի ամբողջական ցանկը չէ։ Բելառուսը մատակարարել է 60 զրահապատ փոխադրիչներ և անհայտ քանակությամբ «Սկիֆ» տեսակի հակատանկային համալիրներ։ Բելառուսը նաև Ադրբեջանի համար համաձայնեցրել է МАЗ 6317 և МАЗ 5317 տեսակի ռազմական նշանակության բելառուսական մեքենաների հավաքումը», – նշում է պարբերականը։
Հիշեցնենք, որ նոյեմբերի 20–ին կայացած մամուլի ասուլիսի ժամանակ ՀՀ վարչապետի պաշտոնակատար Նիկոլ Փաշինյանն
անդրադարձել է Բելառուսի կողմից Ադրբեջանին «Պոլոնեզ» տեսակի համազարկային կրակային համակարգերի մատակարարմանը` նշելով, որ դա տեղի է ունեցել այն ժամանակահատվածում, երբ ՀԱՊԿ գլխավոր քարտուղարի պաշտոնում Հայաստանի ներկայացուցիչն է եղել։
«Մեր դիրքորոշումը պարզ է` դատապարտում ենք նմանատիպ գործարքները, դրանք համարում ենք ուղղված Հայաստանի ազգային շահերի դեմ և կարծում ենք, որ դրանք խեղաթյուրում են ՀԱՊԿ էությունը»,– ասաց Փաշինյանը։
Փաշինյանի խոսքով, այս պահին գլխավոր խնդիրներից մեկն այն է, որ Հայաստանը բացատրություններ ստանա, և պարզվի, թե ինչ պարտավորություններ են ստանձնում ՀԱՊԿ անդամ երկրները միմյանց առջև։-0-