«Սասնա ծռեր» կուսակցությունը դատապարտում է ՀՀ կառավարության կադրային քաղաքականությունը

ԵՐԵՎԱՆ, 16 հոկտեմբերի./Նովոստի–Արմենիա/. «Սասնա ծռեր» կուսակցությունը հանդես է եկել հայտարարությամբ ՀՀ կառավարության վարած կադրային քաղաքականության մասին։ Այս մասին հաղորդում է կուսակցության մամուլի ծառայությունը։

«Ցավով արձանագրում ենք, որ չնայած Սասնա Ծռեր համահայկական կուսակցության և հասարակության լայն շրջանակների հորդորներին, կառավարությունը շարունակում է պատասխանատու պաշտոններին նշանակել նախկին հանցավոր ռեժիմի ներկայացուցիչներին, այդ թվում նրանց, ովքեր աչքի են ընկել իրենց դահճային բնույթով և զբաղվել են ժողովրդին կեղեքելով ու թալանելով։ Կրկին հորդորում ենք Նիկոլ Փաշինյանին ոչ միայն վերանայել նման անընդունելի կադրային քաղաքականությունը, այլև արդեն նշանակված անձանց, առաջին հերթին Վալերի Օսիպյանի և Հունան Պողոսյանի նմաններին ազատել զբաղեցրած պաշտոններից և հանձնարարել ստուգելու այդպիսի անձանց նախկին գործունեությունը՝ ժողովրդի և պետականության դեմ կատարած հանցագործությունների համատեքստում», – նշված է «Սասնա ծռերի» տարածած հաղորդագրության մեջ։

ՀՀ կառավարությունն այսօր արտահերթ նիստի ժամանակ որոշում է կայացրել երեք մարզպետերի նշանակման հարցում։ ՀՀ նախկին փոխոստիկանապետ Հունան Պողոսյանը նշանակվել է Սյունիքի մարզպետ, Արագածոտնի մարզպետ է նշանակվել տարածքային կառավարման և զարգացման փոխնախարար Դավիթ Գևորգյանը, Արմավիրի մարզպետ է նշանակվել Համբարձում Մաթևոսյանը։–0–