ԵՐԵՎԱՆ, 19 սեպտեմբերի. /Նովոստի–Արմենիա/. ՀՀ երկրորդ նախագահ Ռոբերտ Քոչարյանը «Կոմերսանտին» տված ծավալուն հարցազրույցի ժամանակ հայտարարել է, որ հիմա տեղի ունեցող իրադարձությունները պարզապես անընդունելի են երկրի համար և նա իրեն պարզապես չէր ների, եթե մնար անտարբեր տեղի ունեցող իրադարձությունների նկատմամբ։
ՀՀ նախկին նախագահը հիշեցրել է, որ վերադարձել է քաղաքականություն, որից երբեք չի հեռացել, պարզապես եղել է պասիվ` արտահայտվելով միայն սկզբունքային հարցերի շուրջ, որոնց հետ համաձայն չի եղել, իսկ հիմա մտադիր է արտահայտվել ավելի ակտիվ։
Загружается новость ... "Лево"
Միաժամանակ նա նշել է, որ դեռ չգիտի, թե ինչ ձևաչափով է ներգրավված լինելու քաղաքական գործընթացներում` չբացառելով ինչ–որ կուսակցությունում, շարժման մեջ կամ որպես անհատ մասնակցության հնարավորությունը։
«Դեռ չեմ կողմնորոշվել, այդ թվում նաև այն հարցում, թե ինչ է տեղի ունենում։ Չեմ կարծում, որ Հայաստանում ինչ–որ մեկը գիտի, թե ինչ է տեղի ունենում», – ասել է Քոչարյանը։
«Իմ հետևում երկու նախագահություն է` Ղարաբաղում և այստեղ` Հայաստանում։ Եվ նրանք երկուսն էլ իրենց արդյունքներով բավականին հաջողված են։ Հարցն այն չէ, որ ես իշխանություն եմ փնտրում, ես 10 տարի չեմ փնտրել։ Հասել եմ կարիերայի հնարավոր բոլոր բարձունքներին։ Այո, ցանկանում էի, որ ինձ դիմեին` ասելով «պարոն նախագահ», այլ ոչ թե «պարոն վարչապետ», առաջինն ավելի լավ է հնչում։ Սակայն հարցը կոնկրետ պաշտոն զբաղեցնելու ձգտման մեջ չէ, այլ այն բանի հստակ գիտակցման, որ հիմա տեղի ունեցող իրադարձությունները պարզապես անընդունելի են երկրի համար։ Ես ինձ պարզապես չէի ների, եթե մնայի անտարբեր տեղի ունեցող իրադարձությունների նկատմամբ», – նշել է Քոչարյանը։
Պատասխանելով Փաշինյանի այն հայտարարությանը, թե «Քոչարյանն ու Սերժ Սարգսյանը քաղաքական դիակներ են»`Ռոբերտ Քոչարյանը նշել է, որ այն դեպքում նա չպետք է անհանգստացնի ներկա վարչապետին, ով իրեն է նվիրում սեփական հանրահավաքների մեծ մասը։
«Կարծում եմ` ցանկացած խելամիտ մարդ հասկանում է պատասխանը։ Կարծում եմ, որ Փաշինյանին շատ են մտահոգում արդյունքները, որոնք գրանցվել են իմ նախագահության օրոք։ Եվ հասարակության զգալի մասը հասկանում է, որ ես ի վիճակի եմ դա անել ևս մեկ անգամ։ Ի՞նչ ենք մենք հիմա ստացել` հասարակության բաժանում սևերի և սպիտակների, վախեցրել ենք ոչ միայն սեփական, այլև օտարերկրյա ներղրողներին, սննդամթերքի գների կտրուկ աճ, պարզորոշ տնտեսական քաղաքականության բացակայություն։ Ոչ ոք չգիտի, թե ինչ կա կառավարության այս նոր անդամների գլխում։ Դա նշանակում է անորոշություն , իսկ փողերն անորոշությունից փախչում են», – հայտարարել է ՀՀ երկրորդ նախագահը։
«Կարծում եմ, որ իմ կալանքը հավանական քաղաքական հակառակորդին մեկուսացնելու փորձ էր։ Հայաստանում շատ լավ գիտեն իմ բնավարությունը. ես երբեք չեմ խաղացել և չեմ ձևացրել», – նշել է Քոչարյանը։–0–