ԵՐԵՎԱՆ, 5 դեկտեմբերի. /Նովոստի–Արմենիա/. Հայաստանը ոչ մեկին, ոչ մի խնդրանքով, առաջարկով չի դիմել, չորեքշաբթի հայտարարել է ՀՀ վարչապետի պաշտոնակատար Նիկոլ Փաշինյանը` մեկնաբանելով Հայաստանի խնդրանքով ՀԱՊԿ գագաթնաժողովի տեղափոխման մասին ՌԴ նախագահի օգնական Ուշակովի հայտարարությունը։
Ավելի վաղ ՌԴ նախագահի օգնական Յուրի Ուշակովը լրագրողներին տեղեկացրել է, որ ՀԱՊԿ երկրների առաջնորդների գագաթնաժողովը, որը նախատեսված էր դեկտեմբերի 6–ին հետաձգվել է` հաշվի առնելով Հայաստանի համապատասխան խնդրանքով, որը պատրաստվում է ընտրությունների։ Նա նաև հայտարարել է, որ մինչև տարեվերջ ՀԱՊԿ նոր գագաթնաժողովը դժվար թե կայանա, և ՀԱՊԿ գլխավոր քարտուղարի պարտականությունները կատարելու է Վալերի Սեմերիկովը։ Փաշինյանի մամուլի քարտուղար Արման Եղոյանն ավելի ուշ հերքել է Ուշակովի հայտարարությունը։
«Մենք հետևողականորեն շարունակում ենք մեր բանակցությունները մեր թեկնածուի շուրջ (ՀԱՊԿ գլխավոր քարտուղարի. խմբգր.)։ Ընդհանրապես, հանդիպումների ժամանակ քննարկվում են տարատեսակ հարցեր», – ասաց Փաշինյանը չորեքշաբթի Երևանի մետրոպոլիտենում նախընտրական քարոզարշավի ժամանակ։
Նա նաև ավելացրեց, որ անհրաժեշտություն չի տեսնում ՌԴ նախագահի հետ քննարկել նրա օգնականի հայտարարություններն` ավելացնելով, որ «կան ավելի կարևոր հարցեր»։
Նա նաև հայտարարեց, որ գլխավոր քարտուղարի հարցն ամենակարևորը չէ, անգամ երկրորդական չէ։
«Այս համատեքստում քննարկվում են շատ ավելի լուրջ և կարևոր հարցեր` ՀԱՊԿ արդյունավետությունը, ինչպես նաև ՀԱՊԿ մասնակից երկրների փոխադարձ պարտակատություններն ու դրանց կատարման մեխանիզմները», – հայտարարեց ՀՀ վարչապետի պաշտոնակատարը։
Դեկտեմբերի 2–ին ՀՀ վարչապետի պաշտոնակատար Նիկոլ Փաշինյանը Վայոց Ձորում լրագրողներին ասել է, որ ՌԴ նախագահ Վլադիմիր Պուտինը վերջին հեռախոսազրույցի ընթացքում առաջարկել է տեղափոխել ՀԱՊԿ գագաթնաժողովը, որը պետք է կայանար դեկտեմբերի 6–ին Սանկտ Պետերբուրգում։ Փաշինյանը հայտարարել է, որ համաձայնվել է, քանի որ ավելի ճիշտ է համարում այդ հարցը լուծել աշխատանքային ընթացակարգերով։
Հայաստանի և ՀԱՊԿ երկրների հարաբերություններում լարվածություն առաջացավ այն բանից հետո, երբ Հայաստանը նախաձեռնեց և հոկտեմբերի 30–ին ՀԱՊԿ գլխավոր քարտուղարի պաշտոնից հետ կանչեց Յուրի Խաչատուրովին` նախօրոք չհամաձայնեցնելով այդ ընթացակարգերը կազմակերրպության մյուս գործընկերների հետ։ ՀԱՊԿ անդամ պետությունների ղեկավարները Աստանայում նոյեմբերի 8-ին քննարկել են նոր գլխավոր քարտուղարի հարցը: Հիշեցնենք, որ այդ հարցը արդիական է դարձել հոկտեմբերի 30-ին Հայաստանի ներկայացուցիչ Յուրի Խաչատուրովին այդ պաշտոնից ազատելուց հետո:–0–
