ԵՐԵՎԱՆ, 31 հուլիսի./Նովոստի–Արմենիա/. Հայաստանում տեղի ունեցող իրադարձությունները չեն համապատասխանում երկրի նոր ղեկավարության այն հայտարարություններին, որ նախկին իշխանությունների նկատմամբ հետապնդումներ չեն լինելու։
Այս մասին երեքշաբթի լրագրողներին է հայտարարել ՌԴ ԱԳ նախարար Սերգեյ Լավրովը, հաղորդում է ՏԱՍՍ–ը։
Загружается новость ... "Лево"
Երևանի Շենգավիթ համայնքի ընդհանուր իրավասության դատարանը հուլիսի 27–ի գիշերը որոշում ընդունեց երկու ամսով կալանավորել Ռոբերտ Քոչարյանին։Հայաստանի երկրորդ նախագահ Ռոբերտ Քոչարյանին մեղադրանք է առաջադրվել Հայաստանի Հանրապետության սահմանադրական կարգը տապալելու համար: Նույն օրը միջնորդություն է ներկայացվել Երևան քաղաքի ընդհանուր իրավասության առաջին ատյանի դատարան` Ռոբերտ Քոչարյանի նկատմամբ կալանավորումը որպես խափանման միջոց ընտրելու համար: Քոչարյանը «Մարտի 1»–ի գործով ՀՔԾ է հրավիրվել որպես վկա, սակայն նրան առաջադրվել է մեղադրանք։ Գործով վկա է կանչվել նաև ՀԱՊԿ գլխավոր քարտուղար Յուրի Խաչատուրովը, ում նույնպես առաջադրվել է մեղադրանք։ Նա գրավի դիմաց ազատ է արձակվել։ Որպես մեղադրյալ ներգրավված է նաև ՀՀ պաշտպանության նախկին նախարար Միքայել Հարությունյանը, ով այս պահին հանրապետությունում չէ։
Նրա խոսքով, «վերջին օրերի իրադարձությունները հակասում են Հայաստանի նոր իշխանությունների կողմից վերջերս արված այն հայտարարություններին, որ նրանք մտադիր չեն քաղաքական դրդապատճառներով հետապնդել նախկին իշխանություններին»։
«Ռուսաստանը, որպես Երևանի դաշնակից, միշտ հետաքրքրված է եղել հայկական պետության կայունության հարցում, այդ պատճառով Հայաստանում տեղի ունեցող իրադարձությունները չեն կարող մեզ չմտահոգել, այդ թվում` ԱՊՀ տարածքում այն կազմակերպությունների նորմալ աշխատանքի տեսանկյունից, որտեղ մասնակցում է Հայաստանը», – նշել է ՌԴ ԱԳ նախարարը` հույս հայտնելով, որ Հայաստանում քաղաքական գործիչների կալանքների հետ կապված իրավիճակը կառուցողական լուծում կստանա։
«Վերջին օրերին մենք մի քանի անգամ հայկական ղեկավարությանը հայտնել ենք մեր ունեցած մտահոգության մասին։ Հույս ունենք, որ իրավիճակն ամեն դեպքում կգնա կառուցողական ճանապարհով», – ասել է նա`ընդգծելով ԱՊՀ տարածքում ինտեգրացիոն միությունների կարևորությունը։–0–
