ԵՐԵՎԱՆ, 3 հունիսի. /Նովոստի–Արմենիա/. Հայոց ցեղասպանության մասին Բունդեսթագի բանաձևը հանգեցրեց նրան, որ Գերմանիա–Թուրքիա հարաբերությունները վերջին շրջանում հայտնվեցին ցածրագույն կետի վրա, գրում է Daily Express բրիտանական թերթը։
Բունդեսթագի պատգամավորները հունիսի 2-ին ընդունել են բանաձև, որը 1915 թ.-ին հայերի դեմ հանցագործությունները ցեղասպանություն է ճանաչում: Բանաձևը ընդունվել է պատգամավորների մեծամասնության կողմից, «դեմ» քվեարկել է մեկ խորհրդարանական, ևս մեկը ձեռնպահ է մնացել: Քվեարկությունները նախաձեռնվել են իշխող խորհրդարանականների մեծամասնության և «Կանաչների» դիմումի հիման վրա: Բանաձևը կոչվում է «1915 և 1916 թ.-ին Օսմանյան կայսրությունում Հայոց ցեղասպանության և քրիստոնյա այլ փոքրամասնությունների զոհերի հիշատակին»:
Հոդվածում նշվում է, որ Բեռլինի և Անկարայի հարաբերությունները հասան եռման կետին այն բանից հետո, երբ Գերմանիան ընդունեց Հայոց ցեղասպանությունը ճանաչող բանաձևը։
Գերմանիայի կողմից Հայոց ցեղասպանության ճանաչումն ուղերձ է ողջ աշխարհին. ՀՀ նախագահ>>
«Այս որոշումն ավելի շատ կբարդացնի թուրք–գերմանական երկխոսությունը, որը վերջերս ավելի է լարվում միգրացիոն ճգնաժամի պատճառով», – գրում են հոդվածի հեղինակները։
Թերթը նաև նշում է, որ իրադարձությունների զարգացման ներկա սցենարը, վերջին հաշվով, կարող է անգամ «սպառնալիքի տակ դնել» ԵՄ–ի և Անկարայի միջև միգրանտների հարցերով համաձայնագրի իրականացման հնարավորությունը։
Ոստիկանությունը բողոքի ակցիայի պատճառով շղթայել է Ստամբուլում Գերմանիայի գլխավոր հյուպատոսությունը>>
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի, Լյուքսեմբուրգի խորհրդարանները, Կանադայի խորհրդարանի համայնքների պալատը և Լեհաստանի սեյմը, Պարագվայի Սենատը,Վատիկանը, Եվրախորհդարանը, Եկեղեցիների համաշխարհային խորհուրդը։ -0-
