ԵՐԵՎԱՆ, 21 հոկտեմբերի. /Նովոստի–Արմենիա/. Իր տեսակի մեջ առաջին դրամահավաքը նպատակ ունի ականազերծել Ղարաբաղի Մարտունու շրջանի Մյուրիշեն գյուղը:
The HALO Trust-ը միջազգային, շահույթ չհետապնդող ընկերություն է, որը դրամահավաքի միջոցով նպատակ ունի 30 հազար դոլար հավաքել՝ Լեռնային Ղարաբաղի Մյուրիշեն գյուղը ականազերծելու համար:
Գյուղի 1,8 ակրանոց (1 ակր – 0,405 հա) ականապատ դաշտը վտանգ է ներկայացնում Մյուրիշենի շուրջ 500 բնակիչներին և հարևան Վազգենաշեն գյուղում բնակվող գյուղացիներին: Ականազերծումը թույլ կտա կանխարգելել դժբախտ պատահարները, իսկ տեղի բնակչությունը կկարողանա օգտագործել ականազերծված հողատարածքը՝ փայտ հավաքելու և անասուններին արածեցնելու համար:
1995 թ.-ից ի վեր Մյուրիշենում առնվազն 5 մարդ է վնասվել ականի պայթյունից: The HALO Trust-ը 2007-2011 թթ.-ի ընթացքում ականազարծել է ականապատ երեք դաշտ՝ հեռացնելով 38 հակահետևակային ական, 2 հակատանկային ական և 3 այլ պայթուցիկ: Ականապատ դաշտը, որ ընկերությունը նպատակ ունի մաքրել դրամահավաքի միջոցով, վերջինն է:
Դրամահավաքը «Անվտանգ քայլեր արցախցիների համար» ավելի ծավալուն արշավի մասն է, որի նպատակն է մինչև 2020 թ.-ը ականազերծել Ղարաբաղի բոլոր ականապատ տարածքները: Անանուն դոնորը խոստացել է վճարել անհրաժեշտ 8 մլն դոլարի կեսը, եթե The HALO Trust-ը կարողանա ձեռք բերել ֆինանսական միջոցների մյուս մասը:
Մյուրիշենում բնակվող և ականի պայթյունից տուժած Միքայել Մերջումյանը, ում տունը ականապատ դաշտից կես մղոն (1 մղոնը – 1, 609344 կմ) հեռավության վրա է, նշել է, որ շնորհակալ է, որ ականապատ դաշտը պատրաստվում է մաքրվել։
«Դա նշանակում է, որ գյուղի համար հույս կա, որ հաջորդ սերունդը կարող է անվտանգ ապրել», – նշել է նա։
The HALO Trust-ի տարածաշրջանային տնօրեն Էնդրյու Մուրն իր հերթին նշել է, որ իրենք կազմակերպում են այս դրամահավաքը, քանի որ արցախցիները 22 տարի է, ինչ տառապում են ականապատ դաշտերի պատճառով:
«Ականների պայթյունից զոհերի մեկ երրորդը երեխաներ են: Ականապատ դաշտերը վնասում են նաև տնտեսությանը՝ թույլ չտալով ընտանիքներին օգտագործել հողատարածքը հողագործության համար», – նշել է Մուրը։
The HALO Trust-ը աշխարհի խոշորագույն մարդասիրական կազմակերպությունն է, որը զբաղվում է ականազերծմամբ։ Կազմակերպությունը գործում է Լեռնային Ղարաբաղում 2000 թ.-ից: –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում