ԵՐԵՎԱՆ, 21 դեկտեմբերի. /Նովոստի-Արմենիա/. Լեռնային Ղարաբաղի հակամարտությունը պետք է լուծվի բացառապես խաղաղ ճանապարհով, հայտարարել է Իրանի նախագահ Հասան Ռոհանին:
«Մեզ համար Հայաստանն ու Ադրբեջանը բարեկամ երկրներ են, ու հույսով ենք, որ տարածաշրջանում կայուն խաղաղութան ականատեսը կլինենք: Ղարաբաղյան հակամարտությունը ռազմական լուծում չունի», - չորեքշաբթի Երևանում ՀՀ նախագահ Սերժ Սարգսյանի հետ բանակցությունների արդյունքներով ճեպազրույցի ժամանակ ասաց Հասան Ռոհանին:
Հայաստանի նախագահն իր հերթին հայտարարեց, որ Երևանը խորապես գնահատում է Թեհրանի` «միջազգային իրավունքի նորմերի հիման վրա ղարաբաղյան հակամարտության կարգավորման հետ կապված համասարակշռված դիրքորոշումը», - հաղորդում է Ինտերֆաքսը:
«Բանակցությունների ժամանակ մենք նշեցինք, որ խնդիրը չի կարող ռազմական լուծում ունենալ և ընդգծեցինք այն քայլերի անթույլատրելիությունը, որոնք կարող են հանգեցնել տարածաշրջանում իրավիճակի լարմանը», - ասաց ՀՀ նախագահը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակում։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
