Հայաստանը պետք է հասնի ԼՂՀ-ի ներգրավմանը բանակցային գործընթացում. փորձագետ

ԵՐԵՎԱՆ, 7 ապրիլի. /Նովոստի-Արմենիա/. Հայաստանը պետք է գործադրի բոլոր ջանքերը, որ Ղարաբաղը, որպես շահագրգիռ կողմ, ԵԱՀԿ Մինսկի խմբի ձևաչափով ներառվի հակամարտության կարգավորման բանակցային գործընթացում, հինգշաբթի լրագրողներին ասաց «Գլոբալիզացիա և տարածաշրջանային գործակցություն» վերլուծական կենտրոնի ղեկավար Ստեփան Գրիգորյանը:

«Այժմ Հայաստանը և Ադրբեջանը շփման գծում կրակի դադարեցման վերաբերյալ բանավոր պայմանավորվածություն են ձեռք բերել, բայց առանց Ղարաբաղի մասնակցության նրանք պայմանագիր ստորագրելու իրավունք չունեն: Հայաստանը պետք է առաջ տանի Ղարաբաղի իրավունքները, ինչպես 1994 թվականին», - հայտարարեց Գրիգորյանը:

Փորձագետի խոսքով, հայկական ուժերը փայլուն ռազմական պատրաստվածություն են ցուցադրել, սակայն Երևանը պետք է ավելացնի դիվանագիտական ջանքերը և պնդի, որ Ղարաբաղը ներգրավվի բանակցային գործընթացում:

Նա կոչ արեց ԵԱՀԿ ՄԽ համանախագահներին ավելի իրատեսական քաղաքականություն վարել և մարտական գործողությունների վարման պայմաններում ոչ մի կողմին խնդրի լուծում չպարտադրել:

«Ադրբեջանական իշխանությունը ցույց տվեց, որ ցանկանում է ղարաբաղյան հարցը լուծել զենքի ուժով, և ոչ միայն գրավել տարածքները, այլև` բռնի ուժով վտարել հայերին ղարաբաղյան երկրից: Մինսկի խումբը, իհարկե, մեծ դեր է խաղում և հանդես է գալիս որպես զսպող գործոն, սակայն միջնորները պետք է տեսնեն իրավիճակի իրական պատկերը և չափազանց լավատեսական հայտարարություններ չանեն», - ասաց նա:

Փորձագետն ավելացրեց նաև, որ Հայաստանը անպայման պետք է դիմի միջազգային դատական մարմիններին և ադրբեջանական բանակի հանցագործությունները անպատիժ չթողնի:

«Եկե´ք չմոռանանք, որ գոյություն ունի Ժնևի կոնվենցիա, և Ադրբեջանը փաստորեն խախտում է միջազգային հանաձայագրերը: Ադրբեջանցի զինծառայողները մի շարք հանցագործություններ են կատարել ոչ միայն մեր զինվորների և Ղարաբաղի խաղաղ բնակչության, այլ նաև սեփական զինվորների նկատմամբ», - հայտարարեց Գրիգորյանը: Նա ավելացրեց, որ ադրբեջանական իշխանությունը թաքցնում է բանակի կորուստների թիվը և զոհվածների դիակները:

Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները։

Օպերատիվ տվյալներով`մարտական գործողությունների ընթացքում ոչնչացվել է 2 ուղղաթիռ, շուրջ 30 տանկ, «Գրադ» տիպի համազարկային կայանք, ծանր հրանետային համակարգ (ТОС), ինժեներական տեխնիկա, 6 անօդաչու սարք։ Ադրբեջանական զինուժը տվել է 300-ից ավելի մարդկային կորուստ:

Հայկական կողմը կորցրել է 14 տանկ, ունի 33 զոհ, մոտ 121–ը վիրավոր է, անհետ կորած է համարվում 25–ը։ Զոհվել են նաև քաղաքացիական անձինք, այդ թվում` մեկ երեխա և յոթ կամավոր։ Մարտական գործողությունները դադարեցվել են ապրիլի 5–ին մոտավորապես ժամը 12։00–ին, երբ ուժի մեջ մտան համապատասխան պայմանավորվածությունները։ -0–