ԵՐԵՎԱՆ, 12 ապրիլի. /Նովոստի-Արմենիա/. Հայաստանը պետք է Արցախի ճանաչումը պահի որպես վերջին միջոց, հայտարարել է ՀՀ ԳԱԱ Արևելագիտության ինստիտուտի տնօրեն, ակադեմիկոս Ռուբեն Սաֆրաստյանը:
«Երբ մենք հասկանանք, որ բանակցային գործընթացն իրեն սպառել է, և ուժայինից բացի, այլ լուծում չկա, մենք պետք է ճանաչենք Արցախը և բացահայտ աջակցենք մեր եղբայրներին», - չորեքշաբթի լրագրողներին ասաց Սաֆրաստյանը:
Նրա խոսքով, բանակցային գործընթացի դադարեցումը մեծացնում է պատերազմի հավանականությունը: «Ճանաչելով Արցախը հիմա` մենք կմեծացնենք պատերազմի հավանականությունը մինչև 100%, կսադրենք Ադրբեջանին», - կարծում է Սաֆրաստյանը:
Ընդ որում, նա կարծում է, որ հենց լարվածությունը Սիրիայում փոքր-ինչ թուլանա, համաշխարհային դերակատարների ուշադրությունը նորից կվերադառնա Ղարաբաղյան հակամարտությանը և բանակցային գործընթացը կակտիվանա:
«Ընդ որում, Հայաստանը պետք է ավելի ինտենսիվ օգտագործի դիվանագիտական հնարավորությունները, որ այլ երկրները ճանաչեն Արցախը», - ընդգծեց Սաֆրաստյանը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։ 1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։
Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։ Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ` հակամարտության խաղաղ կարգավորման ուղղությամբ` ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
