Ղարաբաղում ընթացող մարտական գործողություններում հստակ իսլամական հետք է նկատվում. փորձագետ

ԵՐԵՎԱՆ, 5 ապրիլի. /Նովոստի-Արմենիա/. Լեռնային Ղարաբաղի Հանրապետության մարտական գործողություններում հստակ նկատվում է իսլամական հետք, հայտարարել է «Նորավանք» գիտակրթական հիմնադրամի տնօրեն Գագիկ Հարությունյանը` հղում անելով ԼՂՀ նախագահի աշխատակազմի տեղեկատվության գլխավոր վարչության պետ Դավիթ Բաբայանին:

«Դեռ նախորդ տարի տեղեկատվություն կար, որ (Իլհամ) Ալիևի եղբայրն անձամբ է զբաղվում իսլամիստների հավաքագրմամբ և ուղարկում նրանց Սիրիա: Տեղեկություններ կան, որ այժմ այդ մարտիկները վերադառնում են Սիրիայից Ադրբեջան: Մեր տվյալների համաձայն` Ադրբեջանում մահացածներից շատերը զինվորներ չեն հիշեցնում»,- ասաց Հարությունյանը եթեքշաբթի մամուլի ասուլիսում։ Հարությունյանի կարծիքով, հենց այդ պատճառով էլ ադրբեջանական կողմը չի շտապում փոխանակել մահացածներին:

Նա ավելացրել է, որ, ռադիոհաղորդակցությունների գաղտնալսման հիման վրա ստացված տվյալների համաձայն, Ադրբեջանում այժմ թուրք ռազմական շատ հրահանգիչներ և խորհրդատուներ կան։ Ադրբեջանը սկսել է հրետակոծել Հայաստանի տարածքը >> Ապրիլի 1-ի լույս 2-ի գիշերը ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով:

ԼՂՀ ՊՆ–ի մամուլի ծառայության հաղորդմամբ` ապրիլի 3-ի լույս 4-ի գիշերը ղարաբաղաադրբեջանական հակամարտ զորքերի շփման գծի ողջ երկայնքով հակառակորդը ականանետերից ու հրանոթներից շարունակել է արկակոծել ՊԲ առաջնային դիրքերն ու մերձակա հայկական բնակավայրերը։ Ադրբեջանական զորքերն առավոտյան ժամը 07:00-ի սահմաններում առավել ինտենսիվ հրետակոծություններ են սկսել շփման գոտու հարավարևելյան և հյուսիսարևելյան ուղղություններով։

Հակառակորդի ագրեսիվ գործողությունները ճնշելու ուղղությամբ ՊԲ առաջապահ ուժերը ձեռնարկում են բոլոր անհրաժեշտ միջոցները և վստահաբար իրականացնում իրենց առջև դրված մարտական խնդիրները։ Օպերատիվ տվյալներով` մարտական գործողությունների ընթացքում ոչնչացվել է 2 ուղղաթիռ, 29 տանկ, «Գրադ» տիպի 1 կայանք, ծանր հրանետային համակարգ (ТОС), 3 ԲՄՊ, 1 միավոր ինժեներական տեխնիկա, 6 անօդաչու սարք, 5 միավոր այլ զրահատեխնիկա։ Ադրբեջանական զինուժը տվել է 300-ից ավելի մարդկային կորուստ:

Հայկական կողմը կորցրել է 7 տանկ, ունի 20 զոհ, 72–ը վիրավոր է, անհետ կորած է համարվում 26–ը։ Զոհվել են նաև քաղաքացիական անձինք, այդ թվում` մեկ երեխա։ -0–