ԵՐԵՎԱՆ, 3 ապրիլի. /Նովոստի-Արմենիա/. Պաշտոնական Երևանը Մինսկին խորը տարակուսանք է արտահայտել Արցախի շուրջ իրադարձությունների վերաբերյալ դիրքորոշման համար, հայտնում է Հայաստանի պաշտպանության նախարարության մամուլի ծառայությունը:
Ինչպես ասվում է հաղորդման մեջ, ապրիլի 3-ին ՀՀ ԱԳՆ է հրավիրվել Երևանում Բելառուսի դեսպան Իգոր Նազարուկը:
«Հանդիպմանն ԱԳ նախարարի տեղակալ Շավարշ Քոչարյանը դեսպանին հայտնել է հայկական կողմի խորը տարակուսանքը 2016թ. ապրիլի 2-ին տարածված Լեռնային Ղարաբաղի շուրջ իրադարձությունների վերաբերյալ Բելառուսի Հանրապետության ԱԳՆ հայտարարության մեջ տեղ գտած մի շարք դրույթների կապակցությամբ»,- ասվում է հաղորդման մեջ:
Իգոր Նազարուկին հայտնվել է, որ նման հայտարարությունը չի համապատասխանում հայ-բելառուսական հարաբերությունների ոգուն և հակադրվում է ՀԱՊԿ ու միջազգային այլ կառույցների շրջանակներում կողմերի ստանձնած պարտավորություններին, վնաս է հասցնում բանակցային գործընթացին՝ խրախուսելով ուժի կիրառումը ԼՂ հակամարտության կարգավորման գործընթացում:
Բելառուսի ԱԳՆ` նախօրեին տարածած հայտարարությունում, մասնավորապես, նշվում է, որ Մինսկը կողմ է հակամարտության խաղաղ կարգավորմանը միջազգային իրավունքի ընդունված սկզբունքներին և նորմերին համապատասխան, նախևառաջ, ինքնիշխանության, տարածքային ամբողջականության պահպանման և ապահովման և պետությունների սահմանների անխախտելիության, ինչպես նաև ՄԱԿ Անվտանգության խորհրդի և ԵԱՀԿ լուծումների համապատասխան բանաձևերի հիման վրա:
Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ`հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակի ստորաբաժանումները մարտեր են տանում առաջնային գծի բոլոր ուղղություններով` հակառակորդին կենդանի ուժի և ռազմական տեխնիկայի զգալի կորուստներ պատճառելով։ Մասնավորապես, ԼՂՀ պաշտպանության բանակի օպերատիվ տվյալներով, մարտական գործողությունների ընթացքում ոչնչացվել են հակառակորդի երկու ուղղաթիռ, 14 տանկ, հինգից ավելի այլ զրահատեխնիկա, այդ թվում`1 ԲՄՊ և 2 անօդաչու սարք։ Ադրբեջանական զինուժը տվել է 200-ից ավելի մարդկային կորուստ: Հայկական կողմն ունի 18 զոհ և 35 վիրավոր։
Ապրիլի 3-ին՝ ժամը 06:00-ից սկսած, առաջնային գծի հարավային ուղղությամբ հակառակորդը հրթիռահրետանային միջոցների և զրահատեխնիկայի կիրառմաբ շարունակել է ագրեսիվ ռազմական գործողությունների վարումը: «ՊԲ առաջապահ ստորաբաժանումները ձեռնարկում են անհրաժեշտ միջոցառումներ հակառակորդի նահախարձակ գործողությունները ճնշելու համար: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում