ԵՐԵՎԱՆ, 2 մայիսի. /Նովոստի–Արմենիա/. Համացանցում լուսանկարներ են հայտնվել, որոնցում Ադրբեջանի նախագահ Իլհամ Ալիևը պարգևատրում է արցախյան բանակում ծառայող եզդի զինվորին գլխատած և տեսախցիկների առջև նրա գլուխը ցուցադրած զինվորական հանցագործին։
Ղարաբաղյան հակամարտության գոտում աննախադեպ սրման ընթացքում մամուլում և սոցցանցերում հայտնվել էին ցնցող կադրեր, որոնցում ադրբեջանցի զինծառայողները ցուցադրում են 20–ամյա եզդի Քյարամ Սլոյանի կտրած գլուխը։
Հենց այդ զինծառայողներից մեկին է պարգևատրել Ադրբեջանի նախագահ Իլհամ Ալիևը` խախտելով պատերազմի բոլոր օրենքները և միջազգային մարդասիրական իրավունքը, գրում է openblog.am–ը:
Ապրիլյան մարտական գործողությունների ընթացքում ադրբեջանական կողմը կատարել է նաև այլ ծանր ռազմական հանցագործություններ, որոնք դիտարկվելու են Մարդու իրավունքների եվրոպական դատարանում:
Ապրիլի 2–ից 5–ն ադրբեջանական ԶՈՒ–ն ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում