ԵՐԵՎԱՆ, 22 փետրվարի./Նովոստի–Արմենիա/. Ոչ կառավարական կազմակերպությունների և քաղաքացիական հանրության կողմից միջոցառումների անցկացումը ՌԴ օրենսդրությամբ ամրագրված քայլ է։ Այս հայտարարությամբ է ուրբաթ ճեպազրույցի ժամանակ ՌԴ ԱԳՆ պաշտոնական ներկայացուցիչ Մարիա Զախարովան ընդհատել ադրբեջանցի լրագրողին, ով հարց է տվել Մոսկվայում «Լազարևյան ակումբի» նիստին Արցախի ղեկավարության հնարավոր մասնակցության մասին։
Լրագրողը հարց է տվել մարտի 5–6–ը Մոսկվայում «Լազարևյան ակումբի» նիստի անցկացման մասին, որին, նրա խոսքով, կմասնակցեն նաև Արցախի ղեկավարները։ Նա փորձել է միջոցառման անցկացումը կապել այն փաստի հետ, որ Ռուսաստանը ԵԱՀԿ Մինսկի խմբի համանախագահն է։ Չթողնելով, որ լրագրողն ավարտի իր հարցը` Զախարովան կտրուկ ընդհատել է նրան։
«Սպասեք, ի՞նչ կապ ունի Ռուսաստանի համանախագահությունը, այդ գործառույթն ու այս միջոցառումը։ Ի՞նչ միջոցով եք այս ամենը կապում իրար ձեր հարցում։ Դուք այս ամենը մեկնաբանում ենք այն համատեքստում, որ Մոսկվան Ռուսաստանի մայրաքաղա՞քն է։ Տեսնում եք` ինչպես եք ձեր հարցում իրար կապում բաներ, որոնք պետք չէ կապել», – նշել է Զախարովան։
Նա հաստատել է, որ Ռուսաստանն, անխոս, ԵԱՀԿ Մինսկի խմբի համանախագահն է և պաշտոնական մակարդակով կատարում է ստանձնած բոլոր պարտավորությունները։
«Միաժամանակ Մոսկվայում, ինչպես դուք ճիշտ նշեցիք, ամեն օր անցկացվում են տարբեր թեմաներին նվիրված հարյուրավոր համաժողովներ, որոնք կազմակերպում է քաղաքացիական հասարակությունը, ոչ կառավարական կազմակերպությունները։ Կարծում եմ, որ խոսքը, հաստատ, դրանցից մեկի մասին է։ Եթե դուք տեղեկատվություն ունեք, որ այդ միջոցառմանն ինչ–որ կերպ մասնակցում են պաշտոնատար անձինք, խնդրում եմ փոխանցեք ինձ, ես կճշտեմ։ Քանի որ ես նման տեղեկատվություն չունեմ», – ասել է Զախարովան։
«Լազարևյան ակումբը» Հայաստանի և Ռուսաստանի քաղաքացիական հասարակության ներկայացուցիչների համար ստեղծված հարթակ է, որը կոչված է նպաստելու երկկողմ կապերի ամրապնդմանը գիտության, մշակույթի, տնտեսության ոլորտներում, հասարակական երկխոսության ակտիվացման հարցում։ Ակումբի նախաձեռնողը ՌԴ Պետդումայի ԱՊՀ գործերով, եվրոպական ինտեգրման և հայրենակիցների հետ կապերի հարցերով կոմիտեի առաջին փոխնախագահ Կոնստանտին Զատուլինն է։ «Լազարևյան» ակումբի առաջին նիստը տեղի է ունեցելնոյեմբերի 30–ին Երևանում։–0–