ԵՐԵՎԱՆ, 15 դեկտեմբերի. /Նովոստի–Արմենիա/. Կարմիր խաչի միջազգային կոմիտեն ղարաբաղյան հակամարտության կողմերին է փոխանցել անհետ կորածների լրացված ցուցակը, ասվում է ԿԽՄԿ պաշտոնական կայքում։
«Հրադադարի ստորագրումից ավելի քան 20 տարի անց ընտանիքները չգիտեն, թե ինչ է կատարվել ղարաբաղյան պատերազմի ընթացքում անհետ կորած իրենց բարեկամների հետ։ Փորձելով օգնել պատասխաններ գտնելու հարցում` ԿԽՄԿ–ն հակամարտության կողմերին է հանձնում անհետ կորածների լրացված ցուցակը, որի կազմում են` 4496 մարդ, ովքեր ԿԽՄԿ պատվիրակությունների կողմից որպես անհետ կորած են գրանցված Երևանում, Բաքվում և Արցախում»,– ասվում է հաղորդման մեջ։
Նշվում է նաև, որ վերջին ցուցակը փոխանցվել է 2004 թվականին, ինչից հետո ԿԽՄԿ–ն շարունակել է սերտ գործակցությունը պատանդների և անհետ կորածների հարցերով զբաղվող հանձնաժողովների, ինչպես նաև նրանց ընտանիքների հետ` գրանցելով և ճշտգրտելով ռազմական հակամարտության ընթացքում անհետ կորածների գործերը։
«ԿԽՄԿ–ն վստահ է, որ լրացված ցուցակը կօգնի իշխանություններին միաբանել տեղեկատվությունը` ակտիվացնելով իրենց ջանքերը տվյալ նպատակի շուրջ։ ԿԽՄԿ–ն գործում է տարածաշրջանում 1992 թվականից, և հակամարտության հետևանքով անհետ կորածների ճակատագրերի պարզաբանման հարցը կազմակերպության առաջնահերթություններից է»,– ասվում է հաղորդման մեջ։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում