ԵՐԵՎԱՆ, 16 դեկտեմբերի. /Նովոստի–Արմենիա/. Ղարաբաղյան հակամարտության բանակցային գործընթացն այսօր սառեցված է և գտնվում է փակուղային վիճակում, կարծում է ՀՀ ԱԺ պատգամավոր, «Եվրոպական ինտեգրացիա» ՀԿ–ի նախագահ Կարեն Բեքարյանը։
«Հայկական կողմերը պահանջում են պահպանել ձեռք բերված պայմանավորվածությունները, սակայն Ադրբեջանը դա չի ուզում», – ասաց Բեքարյանն ուրբաթ «Նովոստի–Արմենիա» մամուլի կենտրոնում։
Խոսելով Համբուրգում ԵԱՀԿ ԱԳՆԽ–ի շրջանակում ՄԽ համանախագահ երկրների հայտարարության մասին` Բեքարյանն ընդգծեց, որ հայտարարության մեջ արձանագրվել են մի քանի կարևոր տարրեր։
«Հայտարարությունը հասցեավորված չէր, այդուհանդերձ, ղարաբաղյան հակամարտության կարգավորմամբ զբաղվող յուրաքանչյուր կողմի համար հասկանալի էր, որ այն հասցեագրված էր Ադրբեջանին։ Արտգործնախարարները նաև պահանջել են վերադառնալ 1994–94 թթ.–ի համաձայնագրերին, ինչպես նաև Վիեննայում և Սանկտ Պետերբուրգում ձեռք բերված պայմանավորվածություններին, որոնք, մասնավորապես, վերաբերում են ԵԱՀԿ գործող նախագահի անձնական ներկայացուցչի գրասենյակի ընդլայնմանն ու սահմանին վստահության մեխանիզմների ստեղծմանը», – ավելացրեց պատգամավորը։
Նա նաև նշեց, որ հակամարտության ապրիլյան սրացումը չէր կարող չազդել բանակցային գործընթացի վրա։
«Տեղի ունեցածից հետո բանակցային սեղանի շուրջ վերադառնալն ամենաքիչը հեշտ չէ։ Կարծում եմ` միջազգային հանրությունն ու միջնորդները դասեր կքաղեն տեղի ունեցածից», – ավելացրեց Բեքարյանը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակում։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում