ԵՐԵՎԱՆ, 18 նոյեմբերի. /Նովոստի–Արմենիա/. ԵԱՀԿ Մինսկի խմբի շրջանակում ընթացող բանակցային գործընթացն արդյունքում կհանգեցնի ղարաբաղյան հակամարտության կարգավորման, չորեքշաբթի Երևանում կազմակերպված ճեպազրույցի ժամանակ հայտարարեց ԱՄՆ պետքարտուղարի եվրոպական և եվրասիական հարցերով փոխտեղակալ Բրիջիթ Բրինքը։
«ԵԱՀԿ Մինսկի խումբը գործադրում է բոլոր ջանքերը` բանակցային գործընթացը խթանելու նպատակով։ Դա, վերջիվերջո, կհանգեցնի հակամարտության կարգավորման», – ասաց Բրինքը։
Պատասխանելով լայնամասշտաբ ռազմական գործողությունների վերսկսման հնարավորության մասին ադրբեջանական կողմի կանոնավոր հայտարարություններին վերաբերող հարցին` նա ընդգծեց, որ Մինսկի խումբն աշխատում է, «որպեսզի պատերազմը չվերսկսվի»։
«Մեր բոլոր ջանքերն ուղղված են պատերազմի վերսկսումը կանխելուն», – ընդգծեց Բրինքը։
Բրինքը նաև նշեց, որ հիմա համանախագահների ջանքերն ավելի շատ ուղղված են հակամարտող կողմերի միջև լարվածությունը մեղմելուն։
«Մենք տեղյակ ենք, որ վերջերս գրանցվել են բռնության դրսևորումներ, հրապարակվել է համանախագահների համապատասխան հայտարարությունը, որտեղ նշվել է, որ ծանր զենքի և հրետանու կիրառումն անընդունելի է», – ավելացրեց նա։
Միջնորդները քննադատել են ղարաբաղյան կարգավորման ձևաչափը փոխելու փորձերը>>
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին։
Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն, ընդհանուր առմամբ, շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը: Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է:
1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան:-0-