ԵՐԵՎԱՆ, 12 հուլիսի. /Նովոստի-Արմենիա/. Լեռնային Ղարաբաղի հակամարտության կարգավորման հարցում կողմերը շատ ավելի մոտ են հաջողության, քան երբևէ, սակայն մանրամասները բացահայտելը դեռևս վաղ է, հայտարարել է ՌԴ արտգործնախարար Սերգեյ Լավրովը` ամփոփելով Ադրբեջանի ԱԳ նախարար Էլմար Մամեդյարովի հետ հանդիպման արդյունքները:
«Մենք հիմքեր ունենք ենթադրելու, որ այս անգամ ավելի մոտ ենք հաջողության հեռանկարին, քան` մինչ այժմ», - ասել է նա, հաղորդում է
ՏԱՍՍ-ը:
Ընդ որում, ՌԴ ԱԳ նախարարը ավելացրել է, որ հունիսի 20-ին Սանկտ-Պետերբուրգում կայացած Ռուսաստանի, Հայաստանի և Ադրբեջանի նախագահների հանդիպմանը ձեռք բերված պայմանավորվածությունների մասնրապասները չի բացահայտի:
«Հասկանալի պատճառներով մենք հասարակայնորեն չենք քննարկում այն գաղափարները, որոնք քննարկվում են հանդիպման շրջանակում: Երեք երկրների նախագահները հունիսի 20-ի հանդիպումից հետո հատուկ պայմանավորվել են, որ խնամքով են վերաբերվելու այն հույսին, որ առաջացել է: Ոչ թե այն պատճառով, որ ինչ-որ բան ենք թաքցնում, այլ, որովհետև դա էթիկական նորմ է բանակցությունների ժամանակ», - ավելացրել է Լավրովը:
Կոնկրետ քայլեր
Լավրովը նաև հայտարարել է, որ Ռուսաստանը և Ադրբեջանը երկկողմանի շփման ժամանակ քննարկում են կոնկրետ քայլեր, որոնք կարող են և պետք է հանգեցնեն Լեռնային Ղարաբաղում հակամարտության կարգավորման առաջխաղացմանը:
«Երեկ մանրամասն, անկեղծ և վստահելի երկխոսություն ունեցանք Ադրբեջանի նախագահ Իլհամ Ալիևի հետ: Քննարկվել են սկբունքային առումով երկկողմ հարաբերությունները և հետագա քայլերը, որոնք կարող են և պետք է հանգեցնեն Լեռնային Ղարաբաղի հակամարտության կարգավորման առաջխաղացմանը: Լիովին կիսում եմ ձեր խոսքերը երկկողմ հարաբերությունների և ռազմավարական համագործակցության մասին. դրանք զարգանում են բոլոր ուղղություններով՝ առանց բացառությունների», - ասել է Լավրովը:
Մամեդյարովն իր հերթին նշել է «երկխոսության բարձր մակարդակը, որը գնալով ավելի ինտենսիվ է դառնում»: Նրա խոսքով, կողմերը քննարկում են մի շարք հարցեր` տնտեսական, մարդասիրական, ինչպես նաև կապված Լեռնային Ղարաբաղի կարգավորման հետ:
«Հույս կա, որ բանակցային գործընթացի ինտենսիվությունը թույլ կտա քանդել հակամարտության հանգույցը», - ասել է նա: --0--
