ԵՐԵՎԱՆ, 28 ապրիլի. /Նովոստի-Արմենիա/. ԼՂՀ գլխավոր դատախազությունը Ադրբեջանի կողմից ապրիլի 2-ին սանձազերծված լայնածավալ մարտական ագրեսիայի կապակցությամբ հարուցված քրեական գործի շրջանակում տուժած է ճանաչել երկրի ավելի քան 550 քաղաքացու:
Ինչպես հայտնել են Գլխավոր դատախազությունում, Ղարաբաղի Պաշտպանության բանակի հաղորդագրությունների հիման վրա հարուցված քրեական գործերը հետագայում համախմբվել են մեկի մեջ:
Ադրբեջանը գիշերն առաջնագծի երեք ուղղություններով ինտենսիվ հրետակոծության է ենթարկել ղարաբաղյան դիրքերը. ԼՂՀ ՊՆ>>
Քրեական գործերը հարուցվել են ԼՂՀ ՔՕ մի շարք հոդվածներով. ագրեսիվ պատերազմ, հակամարտությունների և զինված բախումների ընթացքում մարտական գործողությունների վարման մեթոդների խախտում, Միջազգային մարդասիրական իրավունքի նորմերի խախտում, քաղաքացիական անձանց սպանություն, սեփականության ոչնչացում, որը կապված չէ մարտական գործողությունների վարման անհրաժեշտության հետ։
Գլխավոր դատախազությունում նշել են, որ քրեական գործի քննությունը շարունակվում է, նշանակված են դատա-բժշկական փորձաքննություններ` մահվան պատճառների, մարմնական վնասվածքների բնույթի և ծանրության աստիճանի, նյութական վնասի չափի հաստատման համար, շարունակվում է տուժածների հարցաքննությունը:
Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։-0-