ԵՐԵՎԱՆ, 1 օգոստոսի./Նովոստի–Արմենիա/. Արցախի Հանրապետության մշակույթի, երիտասարդության հարցերի և զբոսաշրջության նախարարության նախաձեռնությամբ այսօրվանից` օգոստոսի 1-ից կմեկնարկեն զբոսաշրջային կանոնավոր ուղևորափոխադրումներ երեք տարբեր երթուղիներով, հաղորդում է «Արցախպրեսը»` հղում անելով նախարարությանը։
Նշվում է, որ նախաձեռնության նպատակն է զարգացնել ներքին զբոսաշրջությունը, ինչպես նաև ստեղծել նպաստավոր պայմաններ՝ Արցախում զբոսաշրջիկների ճամփորդության համար:
Աղբյուրի հաղորդմամբ՝ գործող երթուղիներն են Ստեփանակերտ-Գանձասար-Ստեփանակերտ, Ստեփանակերտ-Տողի ջրաշխարհ-Ստեփանակերտ և Ստեփանակերտ-«Հունոտի կիրճ» արգելոց-Ստեփանակերտ:
Ստեփանակերտ-Գանձասար երթուղու մեջ ներառված է նաև էքսկուրսիա դեպի Նիկոլ Դումանի տուն-թանգարան, իսկ Ստեփանակերտ-Տողի ջրաշխարհ երթուղու մեջ՝ դեպի Տնջրի ծառ զբոսաշրջավայր և «Տողի մելիքական ապարանք» արգելոց:
Ստեփանակերտ քաղաքից նշված երթուղիների ուղղությամբ ավտոբուսները մեկնելու են օրական մեկ անգամ՝ առավոտյան՝ ժամը 10:00-ին, բացի երկուշաբթի օրերից:
Ավտոբուսների մեկնման և տոմսերի վաճառքի վայրը՝ ք. Ստեփանակերտ, Վերածննդի հրապարակ, զբոսաշրջային տեղեկատվական կենտրոն:
Տոմսերը վաճառվում են ամեն օր՝ ժամը 9:00-ից մինչև 18:00-ն՝ բացառությամբ ընդմիջման ժամերի:
Հատուկ երթուղիներով ուղևորության համար սահմանված է նվազագույն վճար՝ մինչև 250 ՀՀ դրամ:–0–