481.93
+0.2
569.16
+0.19
8.37
-0.02
+18
Եղանակը Երևանում
Հայ
Հայաստանի քաղաքական ուժերը մինչև Կազանի հանդիպումը կարող էին նախագահի հետ քննարկել Ղարաբաղի հարցը
19:09
15 Հունիսի 2011

Հայաստանի դեմոկրատական կուսակցության նախագահ Արամ Սարգսյանի բացառիկ հարցազրույցը «Նովոստի-Արմենիա» գործակալությանը

«Նովոստի-Արմենիա». Պարոն Սարգսյան, Հայաստանի, Ռուսաստանի և Ադրբեջանի ԱԳ նախարարների վերջին հանդիպումից հետո կողմերի դիրքորոշումների որոշակի մոտեցման մասին տեղեկատվություն է հայտնվել: Ի՞նչ եք կարծում՝ ինչի՞ մասին է խոսքը, և ինչպե՞ս եք վերաբերվում, այսպես կոչված, հիմնարար սկզբունքներին:

Ա. Սարգսյան. Առաջին հերթին տեսնենք, թե դրանք որ հիմնարար սկզբունքներն են, որոնցով կողմերը կկարողանային մոտեցնել իրենց դիրքորոշումները: Մեր կուսակցությունը բազմիցս պնդել է, որ այդ հիմնարար սկզբունքները ընդունելի չեն ոչ միայն այն պատճառով, որ ձեռնտու չեն հայկական կողմին, այլև այն պատճառով, որ կհանգեցնեն իրավիճակի նոր ապակայունացման: Դա ամենակարևորն է: Թեկուզ վերցնենք հայկական կողմի համար ընդունելի համարվող միջանկյալ կարգավիճակի հարցը:

«Միջանկյալ կարգավիճակ» հասկացությունը մշակվել է մեր կողմից ԵԱՀԿ-ի մոդելային խմբում, որն աշխատում էր վեց տարի Սնեգիրիում ամերիկյան և ռուսական կողմերի պրոտեկտորատի ներքո: Սակայն այդ փաստաթղթում, որը կոչվում էր շրջանակային համաձայնագիր, և այս անվանումը ևս վերցվել էր մեր խմբից, «միջանկյալ կարգավիճակ» հասկացությամբ նախատեսվում էր, որ ԼՂՀ-ն առաջին հերթին դառնում է բանակցությունների իրական կողմ և որևէ հարցի շուրջ համաձայնության դեպքում ԼՂՀ-ն հակամարտության բոլոր կողմերի հետ հավասար պայմաններում իր վրա է վերցնում այդ հարցերի կատարման պատասխանատվությունը, այսինքն դառնում է այդ գործընթացի սուբյեկտ և ճանաչվում է որպես հակամարտող կողմ: Այս դեպքում ԼՂՀ-ն, եթե անգամ միանգամից չի դառնում միջազգային իրավունքի անկախ սուբյեկտ, ապա գոնե մասամբ սկսում է համապատասխանել այդ հասկացություններին որոշակի կարգով:

Այսպես կոչված՝ Մադրիդյան սկզբունքների փաստաթղթում «միջանկյալ կարգավիճակի» էությունն ու իմաստը բացարձակապես աղոտ են: Եթե խոսքն այն մասին է, որ Ղարաբաղի կարգավիճակը պետք է համապատասխանի նրա այսօրվա մակարդակին, ապա այսօր դա անկախ պետության կարգավիճակ է: Եթե այս ամենը ճանաչվի Ադրբեջանի կողմից, ապա հարցը հանվում է:

«Նովոստի-Արմենիա». Ինչպե՞ս եք վերաբերվում տարածքային ամբողջականության սկզբունքի հիշատակմանը։

Ա.Սարգսյան. Մեր կուսակցությունը բազմիցս հայտարարել է, որ Ադրբեջանի տարածքային ամբողջականության հարցը ղարաբաղյան խնդրի համատեքստում չի կարող քննարկվել մի պարզ պատճառով՝ Լեռնային Ղարաբաղի Հանրապետությունը ձևավորվել է օրինական ճանապարհով։ Այդ ամենը համապատասխանել է միջազգային իրավունքի նորմերին և սկզբունքներին։ Ավելին, Ադրբեջանն է պատերազմ ծավալել պետական նոր կառույցի դեմ և պարտություն կրել։ Այսինքն, Բաքուն ինքն է հենց ընդունել, որ հարցերը լուծում է ոչ թե իրավական, այլ ռազմական ճանապարհով։

Եթե մենք դիտարկում ենք Լեռնային Ղարաբաղի խնդիրը ցանկացած համատեքստում Ադրբեջանի տարածքային ամբողջականության շրջանակներում, ապա դա անլուծելի հարց է, դա փակուղի է, և բոլորը պետք է դա հասկանան։ Անհնար է պատկերացնել մի իրավիճակ, որի դեպքում ԼՂՀ-ն երբևէ կհամաձայնի Ադրբեջանի կազմում գտնվելու կարգավիճակի հետ, առավել ևս, որ այդ երկիրն ինքն է հրաժարվել Ադրբեջանական ԽՍՀ-ի իրավահաջորդությունից։ Հակամարտության համանախագահները և կողմերը հասկանում են, որ խնդրի լուծումն այս ձևով գոյություն չունի։ Այդ դեպքում, ի՞նչ է սա։ Բանակցությունների իմիտացիա՞։ Երեք պետությունների ղեկավարները պատրանք են ստեղծում, թե չե՞ն տեսնում անհաղթահարելի խոչընդոտը։ Մյուս կողմից, երկու կողմերի՝ Ադրբեջանի և Հայաստանի վրա ճնշումն այդ համատեքստում հիմնարար սկզբունքների շուտափույթ համաձայնեցման նպատակով նշանակում է, բառացիորեն, կողմերի հրահրում նոր ռազմական գործողությունների։ Այսինքն, ես շատ մեծ և լուրջ վտանգ եմ տեսնում, որ դա կարող է հանգեցնել ռազմական առճակատման նոր փուլի։

«Նովոստի-Արմենիա». Ի՞նչ կասեք այլ սկզբունքի՝ այսպես կոչված հետաձգված հանրաքվեի մասին:

Ա. Սարգսյան. Ի՞նչ է նշանակում հետաձգված հանրաքվե… Առաջին հերթին, ես, անկեղծ ասած, միջազգային պրակտիկայում նույնիսկ չեմ պատկերացնում նմանատիպ տերմինաբանություն: Հանրաքվեի հարցում զիջումներ չեն կարող լինել: Կամ Ադրբեջանը հիմա պատրաստ է ճանաչել Լեռնային Ղարաբաղի անկախ կարգավիճակը, և հայկական կողմը փոխզիջումների է գնում հիմնարար այլ հասկացությունների հարցում, կամ ոչ մի փոխզիջում լինել չի կարող, քանի որ խնդրի էությունը ԼՂՀ-ի կարգավիճակն է: Հանրաքվեի հասկացությունը ինձ համար բացարձակ անհեթեթություն է: Եթե հայկական կողմը համաձայնի այլ նոր հանրաքվե անցկացնել, ապա դա կլինի շատ մեծ և ոչ արդարացված զիջում, քանի որ այն ամենը, ինչ արվել է ԼՂՀ-ում այս 20 տարիների ընթացքում, մենք հավասարեցնում ենք զրոյի, և ողջ գործընթացը նորից ենք սկսում: Եթե մենք ցանկանում ենք հաստատել ԼՂՀ ժողովրդի կամարտահայտությունը, ապա ինչու՞ պետք է հետաձգված հանրաքվե անցկացնենք:

«Նովոստի-Արմենիա». Դուք վերջերս հանդես եկաք ԵԱՀԿ Մինսկի խմբի համանախագահների լիազորությունները փոփոխելու առաջարկով: Խոսեք, խնդրեմ, ձեր առաջարկների էության մասին:
 
Ա.Սարգսյան.
Ես արդեն տասը տարի է, ինչ ասում եմ, որ այդ հակամարտությունը դադարել է տեղային լինելուց, և միայն այսօր են մյուս ուժերը սկսել գիտակցել, որ այն չի լինի պատերազմ՝ երկու և երեք կողմերի միջև, այլ տարածաշրջանային ընդհարում կդառնա, հնարավոր է՝ նույնիսկ ինչ-որ ավելի մեծ բանի վերածվի: Այժմ չեն վերացվել այդ շատ մեծ, լայնածավալ պատերազմի պատճառները: Դրանք, հակառակը, ավելի են խորացել: Դա է պատճառը, որ այդ առումով պետք է նշել վստահության չափանիշները, որոնք կարող են մոտեցնել խնդրի լուծումը, քանի որ Մինսկի խմբի՝ այսօրվա ունեցած պարտավորությունների մակարդակով խնդրի լուծումն անհնար է: ԵԱՀԿ ՄԽ համանախագահները հակամարտության հետևանքների վերացման համար մանդատ ունեն, իսկ խնդրի լուծումը կարող է բոլորովին այլ հարթության վրա լինել, քանի որ խնդիրն առավել խորն է, քան հակամարտություն հասկացությունը:

Ես պարզապես վստահ եմ, որ, եթե ոչ այսօր, ապա վաղը, ԵԱՀԿ-ն կգտնի այդ ձևաչափի փոփոխման ձևը: Ոչ թե  բանակցողների, այլ լիազորությունների ձևաչափը: Դա շատ կարևոր, էական տարր է: Հատկապես համանախագահները պետք է  նոր լիազորություններ ունենան, որոնք հնարավորություն կտան լուծել խնդիրը՝ ելնելով դրա էությունից, և այդ համատեքստում վստահության չափանիշներն առաջնային կդառնան:

«Նովոստի-Արմենիա». Ի՞նչ եք կարծում, որո՞նք են Ադրբեջանի ռազմականացման իրական նպատակները:

Ա.Սարգսյան. Իլհամ Ալիևը, որքան հնարավոր է պատկերացնել նրա դիրքորոշումը, Հայաստանի և Լեռնային Ղարաբաղի դեմ «սառը պատերազմ» մտցնելու ուղղվածություն է ստանձնել: Բաքուն որոշակի նավթադոլարներ է օգտագործում զենք գնելու և սպառազինվելու համար՝ փորձելով հայկական կողմին ներգրավել սպառազինության մրցավազքի մեջ: Պարոն Ալիևի պատկերացումով՝ հայկական կողմը պետք է սնանկանա այդ մրցավազքում, իսկ սնանկացած երկիրը հնարավոր է հանգիստ գրավել: Հայկական կողմը պետք է այդ իմաստով խրախուսի պարոն Ալիևին, թող նա ապրի այդ երազանքներով և թող հենց այդպես էլ մտածի:

Բայց ուրիշ կողմ էլ կա, որը շատ լավ գիտի Ալիևը. բանակի սպառազինման և մարտունակության բարձրացման համար ծախսվող երեք միլիարդից առնվազն  50 տոկոսը «ուտվում է» կոռուպցիոն մեթոդներով: Կասկածել պետք չէ, ադրբեջանցիները դա շատ լավ գիտեն:

Հաշվի առնելով այն, որ այդ միջոցների կեսը գտնվում է պաշտոնյաների կամ նույն կլանի գրպաններում, ստացվում է, որ ադրբեջանական բանակի սպառազինման ու մարտունակության աստիճանի բարձրացումն ընդամենը 94 թվականից հետո ունեցած բացթողումը լրացնելու փորձ է:
Խնդրի երկրորդ ասպեկտը. եթե անգամ նրանք կարողանան հավաքել անհրաժեշտ ներուժը, նրանք հրաշալի գիտեն, որ պատերազմի դեպքում իրենց կողմն ավելի շատ բան կկորցնի: Բաքվում դա շատ լավ են գիտակցում, այդ պատճառով էլ մեզ շանտաժի են ենթարկում պատերազմով, իհարկե, իրենց գործն է, սակայն դա մեզ հեռացնում է խնդրի լուծումից:

«Նովոստի-Արմենիա». Իսկ ի՞նչ եք առաջարկում այսօր:

Ա.Սարգսյան. Հաշվի առնելով իրավիճակի ողջ լրջությունը, Դովիլում միջնորդների հայտարարությունը, ճնշման հնարավոր փորձերը՝ մենք կարծում ենք, որ ՀՀ նախագահ Սերժ Սարգսյանը պետք է խորհրդատվության համար կրկին հավաքի կուսակցությունների ղեկավարներին, ինչպես դա արեց ավելի վաղ: Դա շատ ճիշտ ձև է, որը նա կիրառեց, և այդ հանդիպումների արդյունավետությունն ակնհայտ է՝ հատկապես հայ-թուրքական հարաբերությունների քննարկումից հետո:

Դուք հավանաբար հիշում եք, թե  ինչ էական փոփոխություններ տեղի ունեցան այդ հարցում, ես առաջին հերթին նկատի ունեմ Սահմանադրական դատարանի որոշումը: Այսօր նախագահի հետ կուսակցությունների ղեկավարների նոր խորհրդակցություն գումարելու և մինչև Կազանի հանդիպումն այդ իրավիճակը քննարկելու շատ լուրջ անհրաժեշտություն կա, քանի որ ցանկալի չէր լինի Կազանից հետո կրկին սկսել քննադատական դիրքորոշումներից  քննարկել հայկական կողմի արածը:

«Նովոստի-Արմենիա». Այսօր շատ է խոսվում տարածաշրջանում խաղաղապահ ուժեր մտցնելու հնարավորությունների մասին: Ինչպե՞ս եք դրան վերաբերվում:

Ա.Սարգսյան. Ի՞նչ խաղաղապահ ուժերի մասին կարող է խոսքը գնալ, երբ գերտերությունների միջև լուրջ տարաձայնություններ կան ոչ միայն Հայաստանին և Ադրբեջանին, այլ նաև, ընդհանուր առմամբ, տարածաշրջանին  վերաբերող դիրքորոշումների շուրջ: Ո՞ր երկրներն են պատրաստ իրենց վրա  նման երաշխիքներ վերցնել: Որքանո՞վ այդ երկրները պատրաստ կլինեն իրավիճակի հնարավոր սրման դեպքում զոհաբերել իրենց զինվորների կյանքերը:
 
Առավել էական խնդիր կա՝ մի դեպքում նման երկրների ցուցակի հետ կարող է չհամաձայնել Հայաստանը, մյուսի հետ՝ Ադրբեջանը, իսկ Իրանի տեսանկյունից՝ դա ընդհանրապես անընդունելի է: Մի՞թե մենք տարածաշրջանի լարվածության ևս մի օջախ ենք ցանկանում: Առավելևս, շատ անգամ է խոսվել, որ այդ բոլոր խաղաղապահ ուժերը (որքան էլ հարգենք նրանց դերը) չեն լուծում նման խնդիրները, այլ հակառակը, հաճախ նոր սրացումներ են հրահրում:

Այդ պատճառով ամփոփելով ողջ ասվածը, նշեմ, որ առաջին հերթին մենք ցանկացած համատեքստում դեմ ենք այդ սկզբունքներին, քանի որ դրանք առկա պարիտետի անհավասարակշռման կհանգեցնեն, այսինքն՝ նոր հակադրության: Երկրորդ հերթին, մենք կարծում ենք, որ նույնիսկ եթե գործընթացն այդ առանցքում է ընթանում, անհրաժեշտ են կուսակցության ղեկավարների հետ նախագահի խորհրդակցությունները, ընդ որում այն պետք է լավ պատրաստել: Երրորդը՝ պետք է հատկապես հիմա մտածել, թե ինչպես կարելի է փոխել ԵԱՀԿ Մինսկի խմբի լիազորությունները, որպեսզի այն առավել լայնորեն ընդգրկի խնդիրը և ըստ էության համապատասխան միջոցներ կիրառի:

«Նովոստի-Արմենիա». Ձեր կարծիքով՝ որքա՞ն է Կազանում կողմերի վրա ճնշում գործադրելու հավանականությանը:

Ա.Սարգսյան. Ճնշումը չեմ բացառում, բայց գոյություն ունեն ազգային- պետական շահեր, որոնք ոչ մի համեմատության չեն ենթարկվում ցանկացած ճնշման, այս կամ այն պետության կողմից քո հանդեպ ցանկացած վերաբերմունքի հետ՝ ինչ պետություն էլ որ լինի: Ես հասկանում եմ ճնշումը, երբ կողմերն արհեստականորեն ձգձգում են կամ չեն ցանկանում համաձայնության գալ ամենապարզ հարցի շուրջ: Բայց, երբ խոսքը գնում է ազգային, պետական շահերի մասին, ավելին, գոյություն ունի շատ վտանգավոր, սխալ քայլերի հնարավորությունը, ապա պետք է այդ ամենը բացատրել: Պետք է քաջություն ունենալ հակադրվել այդ ճնշմանը: Մենք իրավունք չունենք մեր ժողովրդին ցեղասպանության վտանգի ենթարկել: Այդ առումով մենք ամենաթարմ պատմական օրինակներն ունենք:

«Նովոստի-Արմենիա». Ճի՞շտ հասկացա, որ դուք ղարաբաղյան հիմնախնդրի արագ կարգավորում չեք ակնկալում:

Ա.Սարգսյան. Իհարկե, արագ կարգավորում չի լինի: Նույնիսկ եթե ինչ-որ հիմնարար դիրքորոշումներ ընդունվեն որպես հիմք, ապա հաջորդ փուլը կդառնա բանակցությունների գործընթացում ԼՂՀ-ի ներգրավումը, այսինքն, բնականաբար, նոր գործընթաց կսկսվի:

Սակայն պետք է նշեմ, որ ներկա ստատուս-քվոն ավելի շատ ադրբեջանական կողմին է ձեռնտու, որքան էլ տարօրինակ է հնչում, բայց դա լիովին ակնհայտ է: Բաքուն հիանալի հասկանում է, որ եթե հայկական կողմից միակողմանի զիջումների չհասնի, իսկ նման զիջումների նա երբեք չի հասնի, ապա բնականաբար շահագրգռված կլինի ստատուս-քվոյի պահպանման հարցում, քանի որ պարիտետի ցանկացած խախտում կհանգեցնի այնպիսի անուղղելի արդյունքների, որ դրանց համար զղջալու առիթներ կունենա:

Բացի այդ, նրանց դեմ կհամախմբվի ողջ հայությունը: Նրանք չափազանց շատ անձնական կորուստներ կունենան, կկորցնեն անձնական հարստությունը, բարեկեցությունը: Ոչ մի կասկած չկա՝ Ալիևը շահագրգռված է, որ ամեն ինչ մնա այնպես, ինչպես կա, որպեսզի մեղուների բունը չփորփրեն:

Թշնամի հայի կերպարի ձևավորումն ինքնադրսևորման ձև է, հարևանի հաշվին ինքնահաստատվելու գործընթաց: Բայց դա այնչափ կոպիտ և անբնական է արվում: Նրանք ոչ մի կերպ չեն կարողանում գլուխ հանել իրենց ծագումնաբանությունից, ուրեմն թող նույն ոգով էլ շարունակեն: Բայց մինչև ե՞րբ: Այդ համատեքստում հայկական կողմը պետք է շատ սառնասրտորեն մոտենա իրավիճակին, հստակ հայեցակարգային դիրքորոշում մշակի:

Ծայրահեղ դեպքում, ես կարծում եմ, որ հայկական կողմը պետք է ճանաչի Ադրբեջանի կազմից Ղարաբաղի դուրս գալու գործընթացի օրինականությունը և ԼՂՀ նոր պետության ձևավորումը: Ադրբեջանը պետք է իմանա, որ եթե  ձգձգի գործընթացը, ապա հայկական կողմը կարող է նման քայլի դիմել: Հայկական կողմը դա պետք է անի, որպեսզի բանակցային գործընթացը վերադարձնի նորմալ հուն, խնդրի էությանը: Դա ինչ-որ դեմարշ կամ հարձակում չի լինի, այլ հենց այն գործողությունը, որը կվերադարձնի գործընթացը խնդրի էությանը:

Մեր առաջարկն արմատապես տարբերվում է «Ժառանգություն» խմբակցության ներկայացրածից: Մենք միշտ ասել ենք, որ ԼՂՀ ճանաչման ժամանակ փաստաթուղթը պետք է բաղկացած լինի երկու կետից: Առաջինն այն է, ինչ արդեն ասեցի, իսկ երկրորդը՝ մենք պետք է ինքնորոշվելու իրավունք տանք օրինականորեն ձևավորվող պետությանը, նրա բնակչությանը: Քանի որ նրանք, Ադրբեջանից անկախ կարգավիճակ ձեռք բերելով, պետք է կողմնորոշվեն՝ ցանկանում են մնալ անկախ պետություն կամ միանալ Հայաստանին: Դա տրամաբանական մոտեցում է: Մեր առաջարկն է՝ ճանաչել  Ադրբեջանի կազմից դուրս գալու օրինականությունը, և պետության ձևավորումն ապահովի հենց այդ իրավունքը: -0-

Loading...
Թեմատիկ նյութեր
Բաժնի այլ նյութեր
12:59
13 Սեպտեմբերի 2017
Էռնա Միր. «Նոր ալիքում» հաղթելն ինձ համար սկզբունքային է
Մրցույթի ամենավառ և սիրված մասնակիցներից է Հայաստանը ներկայացնող 18–ամյա Էռնա Միրը (Միրզոյան) «Նովոստի–Արմենիա» գործակալությանը տված բացառիկ հարցազրույցում խոսել է մրցույթում հաջող մասնակցության տպավորություններից ու սպասումներից։

15:43
12 Սեպտեմբերի 2017
Մեզ հաջողություն է սպասում, եթե կարողանանք Հայաստանի գաստրոնոմիկ ներուժը ճիշտ օգտագործել. փորձագետ
Հայաստանի այսօրվա օրակարգում ամենաակտուալ թեմաներից է զբոսաշրջության զարգացումը։
18:03
15 Հունիսի 2017
Հենրիխ Մխիթարյանը պատմել է բաղձալի նպատակի, հիշարժան հանդիպումների և սիրած գրքի մասին
Հայաստանի հավաքականի և «Մանչեսթեր Յունայթեդի» կիսապաշտպան, Հենրիխ Մխիթարյանը հարցազրույց է տվել «Российсая газета»-ին։


12:52
06 Հունիսի 2017
Ադրբեջանի հետ Հայաստանի խնդիրներն ինքնաբերաբար չեն լուծվի
«Ոսկանապատ» հետազոտական կենտրոնի ղեկավար Հրանտ Մելիք–Շահնազարյանը բացառիկ հարցազրույց է տվել «Նովոստի–Արմենիա» գործակալությանը։  
19:18
16 Մայիսի 2017
Ինչու՞ է Հայաստանին պետք «Նոյյան Տապան». ԲԱՑԱՌԻԿ
Հայաստանը շուտով կդառնա նոր «Նոյյան Տապան»-ի հայրենիք, ընդ որում` բառացիորեն:
14:14
27 Ապրիլի 2017
Պատրաստվում ենք ամռանը. խորհուրդներ ֆիթնես մարզիչից
Ամռան գալստին մնացել է մի ամսից մի փոքր ավելի։
20:22
13 Ապրիլի 2017
Հայաստանը «Եվրատեսիլում» հաղթելու մեծ հնարավորություններ ունի. Գերմանիայի ներկայացուցիչ (ԼՈՒՍԱՆԿԱՐՆԵՐ, ՏԵՍԱՆՅՈՒԹ)
Եվրատեսիլ» երգի միջազգային մրցույթում Գերմանիան ներկայացնող երգչուհի Լևինա Մյուզիքը հարցազրույց է տվել «Նովոստի–Արմենիա» գործակալությանը։
16:52
23 Մարտի 2017
Ինչպե՞ս խուսափել գրիպից և ի՞նչ անել, եթե դուք, ամեն դեպքում, հիվանդացել եք. խորհուրդ է տալիս փորձագետը
Գարնան սկզբին գրիպով և սուր շնչառական  վիրուսային վարակներով հիվանդանալու վտանգը մեծանում է։
17:30
02 Փետրվարի 2017
Սուրենյան. առաջիկա գիշերը Երևանում ձմեռվա ռեկորդային ամենացուրտ գիշերն է լինելու
Վերջին ամիսներին Հայաստանի բնակիչների համար ամենաքննարկվող թեման եղանակն է:
15:58
23 Հունվարի 2017
Հայաստանում բացվել է Yandex-ի ծրագրավորման դպրոցը
Հայաստանը դարձավ Ռուսաստանից հետո առաջին երկիրը, որտեղ սկսեց գործել Yandex-ի ծրագրավորման դպրոցը:
18:58
15 Նոյեմբերի 2016
«Նոր հայեր». երեխաների պես ուրախանում էինք, որ կարողացել ենք նվաճել ՈՒՀԱ–ի գավաթը
«Նոր հայեր» թիմի անդամ և դերասան Արմեն Պետրոսյանը «Նովոստի-Արմենիա» գործակալությանը տված բացառիկ հարցազրույցում խոսել է այն մասին, թե ինչպես է թիմը նվաճել ՈւՀԱ–ի 55-ամյակի հոբելյանական միջոցառման գավաթը, արդյոք կյանք կա՞ ՈՒՀԱ-ից հետո, և նա պատրա՞ստ է, արդյոք, վարպետության դասեր տալ ՈւՀԱ–ի երիտասարդ հայ անդամներին:
12:05
26 Հոկտեմբերի 2016
Ադրբեջանը սահմանային լարվածության հրահրմամբ վերահաստատում է, որ հակամարտության կարգավորումը տեսնում է միայն ռազմական ուղիով. ՊՆ
ՀՀ ՊՆ տեղեկատվության և հասարակայնության վարչության պետ, գեներալ–մայոր Վարդան Ավետիսյանը «Նովոստի–Արմենիա» գործակալությանը տված բացառիկ հարցազրույցում խոսել է «Ազգ–բանակ» նոր գաղափարախոսության, շփման գծում Ադրբեջանի ԶՈւ–ի ակտիվացման, ինչպես նաև հայ ժողովրդի հայրենասիրական ոգու մասին։