486.81
+0.07
517.04
-0.95
8.4
-0.03
-4
Եղանակը Երևանում
Հայ
Ադրբեջանը սահմանային լարվածության հրահրմամբ վերահաստատում է, որ հակամարտության կարգավորումը տեսնում է միայն ռազմական ուղիով. ՊՆ
12:05
26 Հոկտեմբերի 2016

ԵՐԵՎԱՆ, 26 հոկտեմբերի. /Նովոստի–Արմենիա/. Վերջերս ՀՀ պաշտպանության նորանշանակ նախարար Վիգեն Սարգսյանը խոսել է «Ազգ–բանակ» նոր գաղափարախոսության մասին, ըստ որի` բոլոր պետական կառույցներն ու հասարությունը պետք է իրենց ավանդը ներդնեն երկրի անվտանգության և պաշտպանության խնդիրների լուծման գործում։

Այս գաղափարախոսության, շփման գծում Ադրբեջանի ԶՈւ–ի ակտիվացման, ինչպես նաև հայ ժողովրդի հայրենասիրական ոգու մասին «Նովոստի–Արմենիա» գործակալությանը տված բացառիկ հարցազրույցում խոսել է ՀՀ ՊՆ տեղեկատվության և հասարակայնության վարչության պետ, գեներալ–մայոր Վարդան Ավետիսյանը։

«Նովոստի–Արմենիա» – Հայաստանի ռազմաքաղաքական նոր ղեկավարությունը ներկայացրել է նոր տեսլական, որտեղ կարևորագույն դերակատարություն ունի «Ազգ-բանակ» գաղափարախոսությունը: Ի՞նչ կասեք այդ առնչությամբ:

Վ. Ավետիսյան – Բանակաշինությանը զուգահեռ մշտապես կարևորվել և ՀՀ ռազմաքաղաքական ղեկավարության ուշադրության կենտրոնում է եղել «Ազգ-բանակ» գաղափարախոսությունը: Այժմ բանակաշինությունից անցում ենք կատարել «Ազգ-բանակ» գաղափարախոսական հենքի վրա խարսխված «Հասանելի ռեսուրսներով առավելագույն արդյունքի հասնելու» ռազմավարական սկզբունքին: «Ազգ-բանակ» գաղափարախոսությունը «Ազգ-հավատ-բանակ-պետություն» արժեհամակարգի խտացված բանաձևն է: Այն որոշիչ ու թելադրող գերակայությունն է և այդ գերակայությունից ցանկացած նահանջ Հայաստանի և Արցախի համար կունենա ծանրագույն հետևանքներ: «Ազգ-բանակ» գաղափարախոսությունը ենթադրում է, որ կառավարման բոլոր մարմինները, քաղաքական ու հասարակական հոսանքները, յուրաքանչյուր ոք պետք է վերլուծի և հասկանա, թե ինչպես է նպաստել պետության պաշտպանունակությանը, առկա խնդիրների լուծմանը: «Ազգ-բանակ» գաղափարախոսական հենքի վրա հիմնված արժեհամակարգի արմատավորումը թույլ կտա հանրային իրազեկման, բանակ-հասարակություն կապի և զինված ուժերի նկատմամբ քաղաքացիական վերահսկողության ընդլայնման, կոռուպցիայի և հովանավորչության դեպքերը բացառելու միջոցով լուծել արդարության ու թափանցիկության մթնոլորտի ամրապնդման, բանակում մարդու իրավունքների ու հիմնարար ազատությունների երաշխավորման խնդիրները: Սա նշանակում է գնալ մեկ քայլ առաջ և առավել ամուր հիմքերից՝ ներգրավելով հասարակության բոլոր շերտերին, նոր թափով զարկ տալ Զինված ուժերի զարգացմանն ու հայրենիքի պաշտպանունակության ամրապնդմանը:

«Նովոստի–Արմենիա» – Ապրիլյան մարտական գործողություններից հետո տևական ժամանակ Ադրբեջանը սահմանին պահպանում էր հանգստություն: Սակայն վերջին օրերի ընթացքում կրկին աճել է սահմանային լարվածությունը, ադրբեջանական զինուժը կիրառում է նաև խոշոր տրամաչափի զենքեր, իրականացնում դիվերսիոն հարձակումներ: Ըստ Ձեզ, ինչո՞վ է պայմանավորված Ադրբեջանի կողմից նման ակտիվությունը:

Վ. Ավետիսյան – Ապրիլյան մարտական գործողություններից հետո դեռ երկար ժամանակ Ադրբեջանը չէր կարողանում ուշքի գալ, քանի որ ունեցած մարտական կորուստները` թե՛ անձնակազմի, թե՛ սպառազինության, հսկայական էին, և Ադրբեջանի ռազմաքաղաքական ղեկավարությանը ժամանակ էր անհրաժեշտ կատարվածը վերլուծելու և գործողությունների նոր մարտավարություն մշակելու համար: Ինչ վերաբերում է վերջին շրջանում Ադրբեջանի զինված ուժերի ակտիվացմանը շփման գծում, դիվերսիոն գործողությունների փորձերով լարվածության հրահրմանը, ապա դա պայմանավորված է մի շարք հանգամանքներով:

Բազմիցս հայտարարվել է, որ ապրիլյան մարտական գործողություններից հետո առաջնագծում մեծածավալ ամրաշինական աշխատանքներ են իրականացվել, ԶՈւ ստորաբաժանումները համալրվել են ժամանակից սպառազինությամբ, դիտարկման նոր միջոցներով և գիշերային տեսանելության սարքերով: Հայկական ռազմարդյունաբերության նոր մշակումները ներկայացվեցին վերջերս կայացած «Արմհայտեք 2016» սպառազինությունների և պաշտպանական տեխնոլոգիաների միջազգային ցուցահանդեսի ընթացքում: Իսկ սեպտեմբերի 21-ին ՀՀ անկախության 25 ամյակի կապակցությամբ տեղի ունեցած զորահանդեսից հետո, որի ընթացքում ցուցադրվեց զինված ուժերի նորագույն սպառազինությունը, Ադրբեջանի ռազմաքաղաքական ղեկավարությունն ուղղակի խուճապահար էր: Դիվերսիոն գործողությունների ակտիվացմամբ Ադրբեջանը փորձում է ստուգել հայկական բանակի զգոնությունը, տեխնիկական միջոցների, սպառազինության, դիտարկման սարքերի որակն ու արդյունավետությունը, և, իհարկե, հայ դիրքապահների զգոնությունը:

Այստեղ, իհարկե, կարևոր նշանակություն ունեն նաև պաշտպանության նոր նախարարի նշանակումը և պաշտպանական գերատեսչությունում վերջին փոփոխությունները, հակառակորդը փորձում է ստուգել ՊՆ նոր ղեկավարության արձագանքը և գնահատականները սահմանային միջադեպերին, ինչպես նաև ԼՂ հակամարտության կարգավորման շուրջ զարգացումները: Երևանում անցկացված ՀԱՊԿ գագաթաթաժողովից և ԵԱՀԿ ՄԽ համանախագահների միջնորդական ջանքերի որոշակի ակտիվացումից հետո` երկու երկրների նախագահների նոր հանդիպման նախաձեռնման առումով, Ադրբեջանը փորձում է սահմանային լարվածության հրահրմամբ շոշափել միջազգային հանրության դիրքորոշումը ԼՂ խնդրի վերաբերյալ և կրկին անգամ վերահաստատում, որ հակամարտության կարգավորումը տեսնում է միայն ռազմական ուղիով:

Բացի վերոնշյալ գործոններից, Ադրբեջանում գագաթնակետին է հասել տնտեսական ճգնաժամը: Նավթային գների անկումը, Բաքվում գործող արտասահմանյան մի շարք ընկերությունների մասնաճյուղերի փակումն ու մանաթի արժեզրկումը լուրջ խնդիրներ են հարուցել երկրի ներսում, և Ադրբեջանի իշխանությունը հասարակական դժգոհությունները զսպելու, ներքին խնդիրներից հասարակական ուշադրությունը շեղելու համար սահմանային լարվածություն ստեղծելու այլընտրանք է փնտրում:

«Նովոստի–Արմենիա» – Իսկ կարո՞ղ են սահմանային լարվածություն ստեղծելու փորձերը վերաճել լայնածավալ գործողությունների, մանավանադ, որ Ադրբեջանը չի էլ թաքցնում իր նկրտումները:

Վ. Ավետիսյան – Այդ հավանականությունը երբեք չի կարելի բացառել: Իհարկե, սա չի նշանակում, թե հրադադարի պահպանման ռեժիմի խախտման դեպքերին և հետախուզական-դիվերսիոն գործողությունների փորձերին կարող են հաջորդել լայնածավալ, լայնամասշտաբ ռազմական գործողություններ: Սրանք, պարզապես, ադրբեջանցիների հերթական դիվերսիոն գործողություններն են, ինչն ամբողջությամբ համապատասխանում է Ադրբեջանի իշխանությունների կողմից վարվող հիստերիկ ռազմատենչ քաղաքականության տրամաբանությանը: Ինչքան հսկայական գումարներ վատնի Ադրբեջանի ռազմաքաղաքական ղեկավարությունը սպառազինության ձեռքբերման վրա, այնուամենայնիվ, Ադրբեջանը պատրաստ չէ երկարատև պատերազմի, այլ ուղղակի ձգտում է լարվածության պահպանմամբ իր համար բարենպաստ միջավայր ձևավորել բանակցային գործընթացում: Կարծում եմ, որ ՊԲ առաջապահ ստորաբաժանումների կողմից ադրբեջանական վերջին դիվերսիոն փորձերի տապալումը ստիպել են հարևան երկրի ռազմաքաղաքական ղեկավարությանը հետևություններ անել և համակերպվել մեր սահմանների հուսալիության հետ:

«Նովոստի–Արմենիա» – Ապրիլյան մարտական գործողությունների օրերին և դրան հաջորդած իրավիճակի կայունացման ժամանակահատվածում հայրենասիրական բարձր ոգու և ազգային համախմբվածության ականատեսը եղանք: Պահպանվե՞լ է, արդյոք, այդ ոգևորությունը:

Վ. Ավետիսյան – Ասեմ, որ հայկական զինված ուժերը ինչպես նախկինում, այնպես էլ այսօր պատրաստ են հայկական երկու հանրապետությունների սահմանների պաշտպանությանը՝ այն գիտակցումով, որ երկրի անվտանգության ապահովումը կարևորագույն առաքելությունն է:

Ապրիլյան մարտական գործողությունների ընթացքում և դրան հաջորդած օրերին, իրոք, աննախադեպ էր մեր հասարակության դրսևորած պահվածքը, որն արտահայտվեց «բանակի կողքին», «հանուն բանակի» կոչերով ու բանակին աջակցելու պատրաստակամությամբ և կոնկրետ օգնությամբ ու գործունեությամբ:

ՀՀ պաշտպանության նախարարության աջակցությամբ համապատասխան հրահանգավորում անցնելուց հետո կամավորական հիմունքներով առաջնագիծ մեկնած ազատամարտի վետերանները, երկրապահներն ու կամավորականները ամուր թիկունք եղան զինված ուժերի ստորաբաժանումներին և նպաստեցին Հայաստանի և Արցախի պաշտպանունակության ամրապնդմանը:

Ապրիլյան դեպքերի արձագանքները մեկ անգամ էլ ընդգծեցին այն առանձնահատուկ սերն ու ջերմությունը, որ տածում է հայ մարդը հանուն հայրենիքի արիաբար մարտնչելու և հերոսաբար զոհվելու պատրաստ շարքային զինվորի և ազգային բանակի հանդեպ:

Այսօր էլ պաշտպանության նախարարությունը շարունակում է համագործակցությունը կամավորական ջոկատների հետ և աշխատանքներ են իրականացվում այդ համագործակցությունն առավել կանոնակարգելու համար: Պարբերաբար իրականացվում են պահեստազորայինների ռազմական հմտությունների կատարելագործման, վերապատրաստման ու պատրաստման վարժական հավաքներ և, ըստ անհրաժեշտության, կամավորականների ներուժն ու փորձառությունը օգտագործվելու է հայրենիքի անվտանգության ապահովման համար:–0–               

Loading...
Թեմատիկ նյութեր
Բաժնի այլ նյութեր
17:30
02 Փետրվարի 2017
Սուրենյան. առաջիկա գիշերը Երևանում ձմեռվա ռեկորդային ամենացուրտ գիշերն է լինելու
Վերջին ամիսներին Հայաստանի բնակիչների համար ամենաքննարկվող թեման եղանակն է:
15:58
23 Հունվարի 2017
Հայաստանում բացվել է Yandex-ի ծրագրավորման դպրոցը
Հայաստանը դարձավ Ռուսաստանից հետո առաջին երկիրը, որտեղ սկսեց գործել Yandex-ի ծրագրավորման դպրոցը:
18:58
15 Նոյեմբերի 2016
«Նոր հայեր». երեխաների պես ուրախանում էինք, որ կարողացել ենք նվաճել ՈՒՀԱ–ի գավաթը
«Նոր հայեր» թիմի անդամ և դերասան Արմեն Պետրոսյանը «Նովոստի-Արմենիա» գործակալությանը տված բացառիկ հարցազրույցում խոսել է այն մասին, թե ինչպես է թիմը նվաճել ՈւՀԱ–ի 55-ամյակի հոբելյանական միջոցառման գավաթը, արդյոք կյանք կա՞ ՈՒՀԱ-ից հետո, և նա պատրա՞ստ է, արդյոք, վարպետության դասեր տալ ՈւՀԱ–ի երիտասարդ հայ անդամներին:
13:37
18 Հոկտեմբերի 2016
Քերոլայն Քոքս. աշխարհը պետք է Ադրբեջանին ագրեսոր ճանաչի
Մեծ Բրիտանիայի Լորդերի պալատի անդամ, նախկին փոխխոսնակ, բարոնուհի Քերոլայն Քոքսը վերջերս հերթական անգամ այցելել է Ղարաբաղ:
17:19
17 Հոկտեմբերի 2016
Իսկանդարյան. կես տարում ոչ մի լուրջ տնտեսական առաջընթաց չի կարող գրանցվել
ՀՀ նորանշանակ վարչապետին որքանո՞վ է հաջողվել պրոֆեսիոնալների կառավարություն ձևավորել, ինչպե՞ս է կառավարությունը պայքարելու մենաշնորհների դեմ, ի՞նչ ակնկալել իշխող ՀՀԿ-ի համագումարից։
18:29
25 Սեպտեմբերի 2016
Հոլիվուդյան հանրաճանաչ Jessica ապրանքանիշի հիմնադիրը ցանկանում է մատնահարդարման դպրոց բացել Հայաստանում
Ամերիկահայ հանրաճանաչ մատնահարդար Ջեսիկա Վարթուխյանը, ով եղունգների և ձեռքերի խնամքի հեղափոխական «Jessica» համակարգի ստեղծողն է,«Նովոստի-Արմենիա» գործակալությանը տված բացառիկ հարցազրույցում ներկայացրել է ոլորտի համաշխարհային միտումները, ինչպես նաև Հայաստանի և հայաստանցի մասնագետների մասին տպավորությունները:
18:24
03 Սեպտեմբերի 2016
Միհրան Հարությունյան. ես գնում էի Ռիո միայն մեկ մտքով` հաղթելու. ուրիշ ոչ մի ելք չէի տեսնում, ոչ մի արդարացում
Ռիոյի ամառային 31-րդ Օլիմպիական խաղերն այլևս պատմություն են:
15:30
04 Օգոստոսի 2016
«Սեգոդնյա նոչյու» ռուսական հայտնի ռոք խումբը ցնցել է արցախյան բեմը
Ստեփանակերտում օգոստոսի 3-ին տեղի ունեցավ ռուսական ամենաճանաչված ռոք խմբերից մեկի` «Սեգոդնյա նոչյու» խմբի երկար սպասված համերգը: Խումբը Ստեփանակերտի բնակիչներին իսկապես անմոռանալի երեկո և վառ զգացումներ պարգևեց`կատարելով իր ամենաճանաչված հիթերը, որոնք արցախցիները դեռ երկար կհիշեն:
11:15
07 Հուլիսի 2016
Մխիթարյանն իր առաջին հարցազրույցն է տվել MUTV-ին (ՏԵՍԱՆՅՈՒԹ)
Հայաստանի ազգային հավաքականի ավագ, կիսապաշտպան Հենրիխ Մխիթարյանն իր առաջին հարցազրույցն է տվել «Մանչեսթեր Յունայթեդի» պաշտոնական ալիքին:
13:51
06 Հուլիսի 2016
Ժողովրդական համերգ Արցախի համար
Ռուսաստանում Արցախի ընկերները միջոցներ են հավաքում Լեռնային Ղարաբաղի Հանրապետության քաղաքներից մեկում հայտնի ռուս երաժիշտների մասնակցությամբ «կենդանի» համերգ կազմակերպելու համար։ Մենք մի քանի հարց ենք տվել նախաձեռնող խմբի ղեկավար, հայտնի հրապարակախոս Դենիս Դվորնիկովին։
18:55
04 Հուլիսի 2016
Մխիթարյան. կցանկանայի մի օր հանդես գալ Զիդանի գլխավորությամբ
Հայաստանի հավաքականի կիսապաշտպան Հենրիխ Մխիթարյանը հարցազրույց է տվել «Marca» պարբերականին, որում պատմել է անգլիական «Մանչեսթեր Յունայթեդ» իր տեղափոխության, բարեգործության ու շատ այլ բաների մասին:
15:35
27 Հունիսի 2016
Դիշդիշյանը երազում է ֆիլմ նկարահանել Ֆրունզիկ Մկրտչյանի մասին և հուսով է «Օսկար» ստանալ «Երկրաշարժ» ֆիլմի համար
Ռուսաստանաբնակ հայ հայտնի պրոդյուսեր, «Mars media entertainment» ընկերության ղեկավար Ռուբեն Դիշդիշյանը «Նովոստի–Արմենիա» գործակալությանը տված բացառիկ հարցազրույցում պատմել է իր երազանքի մասին։