Ողբերգական դեպք Արարատում. 1–ամյա աղջիկը մահացել է անզգուշության հետևանքով

ԵՐԵՎԱՆ, 13 սեպտեմբերի. /Նովոստի–Արմենիա/. Չորեքշաբթի ողբերգական դեպք է տեղի ոնեցել Արարատի մարզում:

Ժամը 17:20-ի սահմաններում մահացած վիճակում 1-ամյա աղջիկ երեխա է տեղափոխվել Վեդիի բժշկական կենտրոն։
  
Ինչպես հայտնում է shamshyan.com կայքը, հիվանդանոց են մեկնել Ոստիկանության Արարատի բաժնի օպերատիվ խումբը։ Ժամանել են նաև Ճանապարհային Ոստիկանության աշխատակիցները։
Ոստիկանները պարզել են, որ երեխան հիվանդանոց է տեղափոխվել Արարատի մարզի Վանաշեն գյուղից:


Աղբյուրի տեղեկացմամբ, նույն գյուղի Հրաչիկ Մակարյան փողոցի 25 տանը, տան բնակիչ, 56-ամյա Հմայակ Մեհրաբյանը տան բակում իր վարած Ford Transit ավտոմեքենան հետընթաց կատարելիս՝ անզգուշաբար վրաերթի է ենթարկել 1-ամյա Լարիսա Թորոսյանին, ով հիվանդանոցի ճանապարհին մահացել է:

Փաստի առթիվ հարուցվել է քրեական գործ՝ ՀՀ քր. օր-ի 242 հոդվածի 2-րդ մասի (ճանապարհատրանսպորտային պատահար, որն անզգուշությամբ առաջացրել է մարդու մահ) հատկանիշներով: -0-