Վիճաբանություն, որ վերածվել է դանակահարության. տղամարդը սպանել է կրտսեր եղբորը

ԵՐԵՎԱՆ, 4 փետրվարի. /Նովոստի–Արմենիա/. Նախօրեին ողբերգական դեպք է տեղի ունեցել Հայաստանում։

Ինչպես հայտնում է ոստիկանության մամուլի ծառայությունը, ժամը 19.35-ին ոստիկանության Թալինի բաժին անհայտ քաղաքացուց ահազանգ է ստացվել, որ Նոր Արթիկ-Բագրավան ճանապարհին Արագածավան գյուղի բնակիչ ոմն Ժիրո դանակահարել է եղբորը:

Մեկնած օպերատիվ խումբը պարզել է, որ ոմն Ժիրոն 1970 թ. ծնված Ժիրայր Նազարեթյանն է, իսկ եղբայրը՝ 1973 թ. ծնված Ղևոնդ Նազարեթյանը:


«Նրանք նույն օրը, ժամը 19.00-ի սահմաններում, Նոր Արթիկ-Բագրավան ճանապարհին՝ Նոր Արթիկ գյուղի վարչական տարածքում, «ՎԱԶ-2106» մակնիշի ավտոմեքենայում կենցաղային հարցերի շուրջ վիճաբանել են, որի ընթացքում Ժիրայր Նազարեթյանը դանակահարել է եղբորը, որն ավելի ուշ մահացել է»,– ասվում է հաղորդման մեջ։

Ժամը 22.30-ին Ժիրայր Նազարեթյանը բերման է ենթարկվել ոստիկանության Թալինի բաժին, տվել է խոստովանական բացատրություն և ձերբակալվել:

Դեպքի առթիվ հարուցվել է քրեական գործ: -0-