Թունավորում Հայաստանի մանկապարտեզներից մեկում. երեխաները տեղափոխվել են հիվանդանոց

ԵՐԵՎԱՆ, 10 նոյեմբերի. /Նովոստի–Արմենիա/. Թունավորման դեպք է գրանցվել Լոռու մարզի Ախթալա համայնքի Ճոճկան բնակավայրի մանկապարտեզում։

Ինչպես հայտնում է Past.am–ը, 5 երեխա ջերմության, սրտխառնոցի, լուծի ախտանշաններով տեղափոխվել է Ալավերդու բժշկական կենտրոն:

Մանկապարտեզի տնօրեն Սուրեն Խուդինյանը հայտնել է, որ երեխաներից երկուսն արդեն դուրս են գրվել: Երեք փոքրիկ դեռ շարունակում է բուժում ստանալ:


«Թե ինչից է փոքրիկների առողջությունը վատացել, դեռ պարզ չէ: Անալիզները ուղարկել են լաբորատորիա, պատասխանի են սպասում: Այս պահին նմուշառում է կատարվում սննդից և խմելու ջրից, որի պատասխանները հայտնի կլինեն մի քանի օրից»,– նշվում է հաղորդագրությունում։

Խուդինյանի խոսքով՝ մանկապարտեզում սանիտարական միջոցառումներ են կազմակերպվում: Ծնողների մի մասը սակայն երեխաներին մանկապարտեզ այս օրերին չի ուղարկում:

Ճոճկանում կասկածում են, որ թունավորումը կարող է ջրի պատճառով լինել: -0-