ԵՐԵՎԱՆ, 3 նոյեմբերի. /Նովոստի–Արմենիա/. Հայաստանի վարչապետ Հովիկ Աբրահամյանի որոշմամբ, ստեղծվել է Տուլայի ՃՏՊ–ում տուժածների աջակցության հանձնաժողով, հայտնում է կառավարության մամուլի ծառայությունը։
Տուժած քաղաքացիների և նրանց ընտանիքների աջակցության, ինչպես նաև զոհվածների հուղարկավորությունը կազմակերպելու համար ստեղծած հանձնաժողովը կգլխավորի Հայաստանի տրանսպորտի և կապի նախարար Գագիկ Բեգլարյանը։
Հանձնաժողովի կազմում են` Հայաստանի առողջապահության փոխնախարար Գագիկ Միրիջանյանը, ՀՀ կառավարությանն առընթեր ՀՀ ոստիկանության պետի տեղակալ Սամվել Հովհաննիսյանը, ՀՀ տարածքային կառավարման և արտակարգ իրավիճակների նախարարության աշխատակազմի փրկարար ծառայության պետ Սերգեյ Ազարյանը, ՀՀ կառավարությանն առընթեր քաղաքացիական ավիացիայի գլխավոր վարչության պետի տեղակալ Արսեն Պողոսյանը, ՀՀ արտաքին գործերի նախարարի խորհրդական, ԱՊՀ վարչության պետի պարտականությունները կատարող Արմեն Ղևոնդյանը։
Նոյեմբերի 3–ի լույս գիշերը Տուլայի «Դոն» ավտոճանապարհին Մոսկվա-Երևան երթուղու ավտոբուսը դուրս է եկել երթևեկելի մասից և շրջվել: Ավտոբուսում եղել է մոտ 60 մարդ։
Ռուսական ԶԼՄ–ների տվյալներով, ՃՏՊ–ի հետևանքով զոհվել է ինը մարդ, ավելի քան 35–ը` վիրավորվել է։
Հրապարակվել են Տուլայի ՃՏՊ–ում զոհվածների անունները>>
Տվյալ փաստով հարուցվել է քրեական գործ «Ճանապարհային երթևեկության կանոնների խախտումը, որը հանգեցրել է անզգուշությամբ երկու և ավելի անձանց մահվան»։
Իրավապահները դիտարկում են ավտոբուսի տեխնիկական անսարքության վարկածը, սակայն չեն բացառում, որ վարորդը կարող էր քնել ղեկին։ -0-
