Սպանություն Երևանի կենտրոնում. 29–ամյա երիտասարդը մահացել է սրտի մասում ստացած դանակի հարվածներից (ՖՈՏՈ)

ԵՐԵՎԱՆ, 20 մարտի./Նովոստի–Արմենիա/. Նախօրեին երեկոյան սպանություն է տեղի ունեցել Երևանի կենտրոնում:

Shamshyan.com–ի հաղորդմամբ, սրտի մասում ստացած դանակի մի քանի հարվածներից «ծայրահեղ ծանր» ախտորոշմամբ Տիգրան Մեծ պողոտայի վրա գտնվող «Քուին բուրգեր»-ի մոտակայքից Երևանի Թիվ 1 Հերացու անվան բժշկական կենտրոն է տեղափոխվել մի քաղաքացի, ով, վերակենդանացման բաժանմունքում գիտակցության չգալով, մահացել է։

Կայքի հաղորդմամբ, մահացածն Աջափնյակ վարչական շրջանի բնակիչ 29-ամյա Համբարձում Եզեկյանն է:

Փաստի առթիվ հարուցվել է քրեական գործ ՀՀ ՔՕ 104 հոդվածի 1-ին մասի հատկանիշներով (սպանություն):

Ոստիկանները դեպքի վայրում հայտնաբերել են արնանման հետքեր և դանակ։ Ոստիկանությունն ու քննչական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ հանցագործությունը բացահայտելու ուղղությամբ:–0–