Պարզվում են ենթասպա Գեղամ Եղիազարյանի մահվան հանգամանքները

ԵՐԵՎԱՆ, 6 սեպտեմբերի. /Նովոստի-Արմենիա/. Քննություն է կատարվում նախօրեին քարափի մեջ հայտնաբերված ենթասպա Գեղամ Եղիազարյանի մահվան հանգամանքները պարզելու նպատակով, հաղորդում է ՀՀ ՔԿ մամուլի ծառայությունը։

Քննությունը վարում է ՀՀ քննչական կոմիտեի ԶՔԳՎ ութերորդ կայազորային քննչական բաժինը։

Ենթասպա Գեղամ Ալբերտի Եղիազարյանի դին հայտնաբերվել էր նախօրեին ժամը 15:30-ի սահմանում ՀՀ ՊՆ N զորամասի պահպանության տեղամասի մարտական դիրք տանող ճանապարհը կրճատող ժայռի տակ՝ քարափի մեջ։

Կատարվել են դեպքի վայրի և դիակի արտաքին զննություններ, նշանակվել է դիակի դատաբժշկական փորձաքննություն:

«ՀՀ քննչական կոմիտեի ԶՔԳՎ ութերորդ կայազորային քննչական բաժնում ձեռնարկվում են անհրաժեշտ քննչական գործողություններ՝ Գ.Եղիազարյանի մահվան հանգամանքները պարզելու ուղղությամբ։ Քննության արդյունքների մասին կտրամադրվի լրացուցիչ տեղեկություն», - նշվում է հաղորդագրության մեջ։ -0-