ԵՐԵՎԱՆ, 15 ապրիլի./Նովոստի–Արմենիա/. Խոշոր հրդեհ է բռնկվել Փարիզի կենտրոնում գտնվող Աստվածամոր (Notre Dame Cathedral) տաճարում, հայտնում է BBC–ն` հղում անելով Փարիզի հրշեջ դեպարտամենտին։
Տաճարի ներսում գտնվող մարդիկ տարհանվել են։ ԶԼՄ–ներում և սոցցանցերում հայտնվում են այրվող տաճարի լուսանկարներ և տեսնյութեր։
Տաճարի ներկայացուցչի խոսքով, հրդեհը սկսվել է Ֆրանսիայի ժամանակով 18։50–ին (Երևանի ժամանակով` 20։50), հայտնում է Liberation պարբերականը։
Ֆրանս Պրեսի հաղորդմամբ, հրշեջներն ասում են, թե հրդեհը կարող է կապված լինել վերականգնողական աշխատանքների անցկացման հետ։
Փարիզի քաղաքապետ Անն Իդալգոն իր Twitter–ում «սարսափեցնող» է անվանել կատարվածը և կոչ է արել հրդեհի վայրում գտնվողներին պահպանել անվտանգության կանոնները և չմտնել հրշեջների տեղադրած փակողներից այն կողմ։
Նախորդ տարի Ֆրանսիայի կաթոլիկ եկեղեցին դրամահավաք էր սկսել տաճարը վերականգնելու նպատակով։
Աստվածամոր տաճարը կառուցվել է 12-14–րդ դարերում և համարվում է Եվրոպայի առավել հայտնի զբոսաշրջային տեսարժան վայրերից մեկը։ -0-