Nissan-ը Երևանում բախվել է 2 հաստաբուն ծառի. կան վիրավորներ

ԵՐԵՎԱՆ, 24 հունվարի. /Նովոստի–Արմենիա/. Նախօրեի երեկոյան խոշոր ավտովթար է տեղի ունեցել Երևանում:

Ժամը 20:40-ի սահմաններում Nissan մակնիշի ավտոմեքենայի վարորդը ծովակալ Իսակովի պողոտայում՝ ԱՄՆ դեսպանատան հարևանությամբ, դուրս է եկել ճանապարհի երթևեկելի գոտուց, բախվել 2 հաստաբուն ծառի:

Ինչպես հայտնում է shamshyan.com–ը, ըստ նախնական տեղեկությունների՝ վթարի հետևանքով, 2 մարդ մարմնական վնասվածքներով տեղափոխվել են «Աստղիկ» բժշկական կենտրոն:

Դեպքի վայր են ժամանել Արտակարգ իրավիճակների նախարարության փրկարար ծառայության թիվ 1 հրշեջ-փրկարարական ջոկատը՝ 1 մարտական հաշվարկով, ովքեր հոսանքազրկել են ավտոմեքենան և փակել գազաբալոնի փականը: -0-