ԵՐԵՎԱՆ, 10 օգոստոսի. /Նովոստի-Արմենիա/. Շաբաթ առավոտյան մահվան ելքով խոշոր ՃՏՊ է տեղի ունեցել Արմավիր-Գյումրի ճանապարհին:
Ինչպես հայտնել է ԱԻՆ մամուլի ծառայությունը, «911» ծառայությանը պատահարի վերաբերյալ ահազանգը ստացվել է ժամը 09:37-ին Թալինի ԲԿ-ի հերթապահից:
Պարզվել է, որ ժամը 08:10-ի սահմաններում Արմավիր-Գյումրի ավտոճանապարհի 42-րդ կմ-ին «Toyota» մակնիշի ավտոմեքենան (վարորդ՝ Վ.Հ., ծնված 1977 թ.) դուրս է եկել ճանապարհի երթևեկելի հատվածից և սահել ձորը:
Հաղորդվել էր, որ վարորդը մահացել է, իսկ ուղևոր Զ.Հ.-ն (ծնված 1969 թ.) տեղափոխվել է հիվանդանոց:
Shamshyan.com-ն իր հերթին հայտնում է, որ հիվանդանոց տեղափոխված 50-ամյա Զարինե Հակոբյանն ավելի ուշ մահացել է Թալինի բժշկական կենտրոնում:
Փաստի առթիվ հարուցվել է քրեական գործ ՀՀ ՔրՕրի 242 հոդվածի 2-րդ մասի 3-րդ կետի հատկանիշներով։
Աղբյուրը հայտնում է, որ կան ևս երկու վիրավորներ` մեկը` Մ.Գրիգորյանը վարորդի քրոջ տղան է, իսկ մյուս վիրավորը՝ վարորդի քույրը։ -0-
