Մահվան ելքով ավտովթար Երևանում. մի քանի երիտասարդներ քարերով հարվածել են օգնության եկած փրկարարներին

ԵՐԵՎԱՆ, 11 ապրիլի. /Նովոստի-Արմենիա/. Նախօրեի երեկոյան դաժան ու ողբերգական ավտովթար է տեղի ունեցել Երևանում:

Ժամը 20:40-ի սահմաններում BMW X5 ավտոմեքենայի վարորդը Թոխմախի գերեզմաններից դեպի Նոր գաջ գործարան տանող ճանապարհահատվածում դուրս է եկել երթևեկելի գոտուց, բախվել ապառաժ քարերին, մի քանի պտույտ գլխիվայր շրջվելով՝ հայտնվել ապառաժ քարերի վրա:

Shamshyan.com կայքի հաղորդմամբ, վթարի հետևանքով մի մարդ տեղում մահացել է, ում դին հայտնաբերվել է ավտոմեքենայից մոտ 10 մետր հեռավորության վրա: Ավելի ուշ պարզվել է, որ մահացածը Երևան քաղաքի Վարդաշեն 8-րդ փողոցի 71 տան բնակիչ՝ 25-ամյա Աշոտ Դովլաթյանն էր: 

Մեկ մարդ էլ՝ նույն փողոցի 82 տան բնակիչ՝ 26-ամյա Գևորգ Կարապետյանը, մարմնական վնասվածքներով տեղափոխվել է Էրեբունի բժշկական կենտրոն:

Կայքից տեղեկանում ենք, որ դեպքի վայրում մի քանի երիատասարդներ սկսել են քարերով հարվածել օգնության եկած Արտակարգ իրավիճակների նախարարության փրկարար ծառայության հրշեջ-փրկարարներին և Երևանի ճանապարհային ոստիկանության աշխատակիցներին, վնասել են ճանապարհային ոստիկանության և հրշեջ-փրկարարների ծառայողական ավտոմեքենաները:

«Նրանք իրենց քայլը պատճառաբանում էին նրանով, որ շտապօգնությունը չի ժամանում, մինչդեռ Երևանի շտապօգնության բրիգադը օպերատիվորեն ժամանել էր և վիրավորին տեղափոխել հիվանդանոց, իսկ քանի որ երկրորդը մահացել էր, հետևաբար, շտապօգնության փոխարեն պետք է ժամաներ դի տեղափոխող բրիգադը»,- ասվում է գրառման մեջ:

Իրավիճակը հնարավոր է դարձել հանդարտեցնել ոստիկանության Էրեբունու բաժնի օպերատիվ խմբի ժամանումից հետո, երբ ոստիկանության և փրկարարների ավտոմեքենաները կոտրած կասկածյալներին բերման ենթարկեցին ոստիկանության Էրեբունու բաժին: Նրանցից մեկը Վարդաշեն 10-րդ փողոցի 2-րդ շենքի բնակիչ, 24-ամյա Արա Շավեշյանն է:

Ոստիկանությունն ու քննչական բաժինը պարզում են վարորդի ինքնությունը։

Փաստի առթիվ հարուցվել է քրեական գործ՝ ՀՀ ՔՕ 242 հոդվածի 2-րդ մասի հատկանիշով: -0-