Կրակոցներ Շենավան գյուղում. վիրավորների թվում են գյուղի ղեկավարների հարազատները (ՖՈՏՈ)

ԵՐԵՎԱՆ, 24 մարտի. /Նովոստի-Արմենիա/. Նախօրեին կրակոցներ են հնչել Սպիտակում:

Երեկոյան ժամը 20:10-ի սահմաններում, Սպիտակի բժշկական կենտրոնից ոստիկանության Սպիտակի բաժին ահազանգ է ստացվել, որ հրազենային վնասվածքներով իրենց մոտ են տեղափոխվել 3 քաղաքացի:

Ինչպես հայտնում է shamshyan.com-ը, ոստիկանները պարզել են, որ նշված անձինք հիվանդանոց են տեղափոխվել Շենավան գյուղից:



Աղբյուրի տեղեկացմամբ, Սպիտակի հիվանդանոցից վիրավորներից երկուսին տեղափոխել են Վանաձորի բժշկական կենտրոն: Դեպքի վայրում հայտնաբերել են «Մակարով» տեսակի ատրճանակից և ինքնաձիգից արձակված մի քանի պարկուճ:

Ոստիկանները հայտնաբերել են նաև որսորդական հրացանից արձակված գործարանային արտադրության պարկուճներ, ինչպես նաև՝ տարբեր հատվածներում արնանման հետքեր:
Դեպքի վայրում հավաքված գյուղացիներն ասել են, որ վիրավորները նույն գյուղի բնակիչներ, 22-ամյա Արմեն Դունամալյանը, 53-ամյա Հայկ Դունամալյանը և 31-ամյա Իշխան Դունամալյանն են:


  
Ընդ որում, Իշխանը Շենավան գյուղի նախկին գյուղապետի տղան է, իսկ Հ. Դունամալյանը ներկայիս գյուղապետի ժամանակավոր պաշտոնակատար Անդրանիկ Դունամալյանի հայրն է:
  
Հարուցվել է քրեական գործ՝ ՀՀ ՔՕ 34-104 հոդվածի 2-րդ մասի և 235 հոդվածի 1-ին մասի և 258 հոդվածի 4-րդ մասի հատկանիշներով:

Ոստիկանությունն ու քննչական բաժինը պարզում են վիրավորների ինքնությունը: -0-