Ինքնասպանությու՞ն, թե՞ վրաերթ. հարուցվել է քրեական գործ

ԵՐԵՎԱՆ, 9 փետրվարի. /Նովոստի–Արմենիա/. ՀՀ ԱԻՆ փրկարար ծառայությունը հայտնել էր, որ նախօրեի երեկոյան անձը չպարզված կինն ինքնասպանություն է գործել` նետվելով Երևան-Թբիլիսի երթուղին սպասարկող գնացքի տակ:

Հայաստանի քննչական կոմիտեի հաղորդմամբ, նախնական տվյալներով՝ 2017թվականի փետրվարի 8-ին` ժամը 22.00-ի սահմաններում, Երևան քաղաքի «Գործարանային» մետրոյի հետնամասում` երկաթգծի 2875 կմ պիկետ 10+20 մետր հատվածում, Ս.Մկրտչյանի վարած Երևան-Թբիլիսի ուղևորատար էլեկտրաքարշ BL10-825, թիվ 372 գնացքը վրաերթի է ենթարկել մի կնոջ, ով ստացած մարմնական վնասվածքներից տեղում մահացել է:

Դեպքի առթիվ ՀՀ ՔԿ Երևան քաղաքի քննչական վարչությունում հարուցվել է քրեական գործ՝ ՀՀ քրեական օրենսգրքի 241-րդ հոդվածի 2-րդ մասով։

Կատարվել են դեպքի վայրի և էլեկտրաքարշի զննություններ:

Նշանակվել է դիակի դատաբժշկական փորձաքննություն:

Ձեռնարկվում են անհրաժեշտ քննչական և օպերատիվ-հետախուզական միջոցառումներ՝ դեպքի հանգամանքները պարզելու ուղղությամբ։ -0-