ԵՐԵՎԱՆ, 25 հունվարի./Նովոստի–Արմենիա/. Քննչական մարմիններն ավարտել են Սոչիի երկու բնակչի նկատմամբ հարուցված քրեական գործի քննությունը, որոնք մեղադրվում են 11 մարդու մահվան մեջ ինքնաշեն խորովածանոցում բռնկված հրդեհի հետևանքով, հաղորդում է ՌԲԿ Կրասնոդարը` հղում անելով ՌԴ ՔԿ մամուլի ծառայությանը։
Քննության տվյալներով, շինության սեփականատերն անօրինական կառուցել է խորովածանոցը 2010–2013թթ–ին Ադլերի շրջանում։ Միաժամանակ, նա չի ձեռնարկել հակահրդեհային պաշտպանության միջոցներ, չի տեղադրել հրդեհի հայտնաբերման և մարման համակարգ, ինչպես նաև հաստատությունում չեն եղել տարհանման ուղիներ։ Նա նաև ապօրինի կերպով միացրել է հաստատության էլեկտրամատակարարումը։
Քննությունը նշում է, որ սեփականատիրոջը հայտնի է եղել, որ հաշվի առնելով բաց թողնված խախտումները` շինությունը վտանգ է ներկայացրել այնտեղ և հարևանությամբ գտնվող մարդկանց կյանքի համար։
Այդ մասին իմացել է նաև ՀՀ քաղաքացին, ով վարձակալել է շինությունն ու աշխատացրել որպես խորովածանոց։ Ավելին, 2018 թ.–ի հուլիսին նա թույլատրել է իր 4 բարեկամներին (8–30 տարեկան) բնակվել այնտեղ։
Ինչպես հաղորդում է ՌԲԿ Կրասնոդարը, խորովածանոցում հրդեհը բռնկվել է 2018թ.–ի հուլիսի 30–ին։ Ինչպես պարզվել է, հրդեհի պատճառն էլեկտրահաղորդիչ լարերի բռնկումն է եղել։ Շինության կառուցման ժամանակ բաց թողնված խախտումների հետևանքով կրակը տարածվել է շենքի կողքի եռահարկ շինության վրա, որը ևս կառուցվել է ապօրինի։ Հայտնի է, որ շենքում վարձակալությամբ հանձնվել են 12 սենյակներ հանգստացողների համար։
Հրդեհի հետևանքով մահացել է 11 մարդ, որոնցից չորսը եղել են խորովածանոցում, ևս յոթը` հարևան շինությունում։ Մահացածների թվում եղել է երեխա։
Փաստի առթիվ սրճարանի սեփականատիրոջ և վարձակալի նկատմամբ հարուցվել է քրեական գործ ՌԴ ՔՕ 109–րդ հոդվածի 3–րդ մասի հատկանիշներով (անզգուշությամբ մահ պատճառելը)։ Այժմ գործը պետք է փոխանցվի դատարան։ Բացի այդ, շարունակվում է քննությունը խորովածանոցի հարակից շինության սեփականատիրոջ նկատմամբ։ Նա մեղադրվում է ծառայության մատուցման մեջ, որը չի համապատասխանում սպառողների կյանքի անվտանգության պահանջներին, ինչն անզգուշությամբ հանգեցրել է երկու և ավել մարդկանց մահվան (ՌԴ ՔՕ 238–րդ հոդվածի 3–րդ մաս)։–0–
