Արցախում ժամկետային զինծառայողը հրազենային վնասվածք է ստացել, ձերբակալվել է նրա ծառայակիցը

ԵՐԵՎԱՆ, 17 հունիսի. /Նովոստի-Արմենիա/. Ժամկետային զինծառայողը հրազենային վնասվածք է ստացել շաբաթ օրը։

Ինչպես հայտնում է Քննչական կոմիտեի մամուլի ծառայությունը, ժամը 11:45-ի սահմաններում, N զորամասի մարտական դիրքում, պարտադիր ժամկետային զինծառայող, շարքային Հ.Գալստյանը ձախ աչքի շրջանի հրազենային վնասվածք է ստացել։

Դեպքի առթիվ առաջին կայազորային քննչական բաժնում ՀՀ քրեական օրենսգրքի 34-104-րդ հոդվածի 1-ին մասով նախատեսված հանցագործության հատկանիշներով հարուցվել է քրեական գործ և կատարվում է նախաքննություն:

Քրեական գործի նախաքննության ընթացքում նշված հոդվածով նախատեսված հանցագործություն կատարելու կասկածանքով, ձերբակալվել է Հ. Գալստյանի ծառայակիցը:

Ինչպես նշվում է հաղորդագրության մեջ, Հ.Գալստյանը քրեական գործով ճանաչվել է տուժող:

Ձեռնարկվում են անհրաժեշտ քննչական և դատավարական գործողություններ՝ դեպքի բազմակողմանի, լրիվ և օբյեկտիվ հետազոտումն ապահովելու ուղղությամբ:

Քրեական գործով նախաքննությունը շարունակվում է: -0-