Երկու անչափահաս երեխաներով կինը վրաերթի է ենթարկվել Երևանում

ԵՐԵՎԱՆ, 11 օգոստոսի. /Նովոստի–Արմենիա/. Հինգշաբթի կեսօրին վրաերթ է տեղի ունեցել Երևանում, հայտնում է shamshyan. com-ը։

Տիգրան Մեծի պողոտայում` «Տաշիր» առևտրի կենտրոնի մոտ, վրաերթի է ենթարկվել փողոցը չթույլատրելի հատվածով 2 անչափահաս երեխաների հետ անցնող մոտ 30 տարեկան մի կին։ Նա փողոցը փորձել է հատել երկու անչափահաս երեխաների հետ։

Վրաերթի ենթարկողը Երևանի բնակիչ, 60-ամյա Գևորգ Ճզտանյանն է, ով փախուստի չի դիմել, իսկ տուժածը տեղափոխվել է «Էրեբունի» բժշկական կենտրոն:

«Վրաերթի պատճառով վարորդ Գ. Ճզտանյանի մոտ ևս առաջացել են առողջական խնդիրներ և մեկ այլ շտապօգնության բրիգադ էլ նրան տեղափոխել է թիվ 1 համալսարանական հիվանդանոց»,– նշվում է գրառման մեջ։



Օպերատիվորեն դեպքի վայր են ժամանել ՀՀ Արտակարգ իրավիճակների նախարարության փրկարար ծառայության ջոկատը, Ճանապարհային ոստիկանության աշխատակիցները։

Փաստի առթիվ նյութեր են նախապատրաստվում:

Դեպքի վայրում հավաքվածներն ասում էին, որ մեծ թվով քաղաքացիներ փողոցն անցնում են չթույլատրելի հատվածով՝ այն դեպքում, երբ մի քանի մետր այն կողմ վերգետնյա անցում կա ու իսկական պատուհաս են դառնում վարորդների համար: -0-