ԵՐԵՎԱՆ, 28 հունիսի. /Նովոստի-Արմենիա/. Ողբերգական դեպք է գրանցվել երեքշաբթի Երևանում։
Ինչպես հայտնում է Հայաստանի ԱԻՆ մամուլի ծառայությունը, երեքշաբթի 14:20-ի սահմաններում ոստիկանության Շենգավիթի բաժին ահազանգ է ստացվել, որ Երևանյան լճում քաղաքացի է ջրահեղձ եղել, և պահանջվում է փրկարարների օգնությունը։
Դեպքի վայր են մեկնել ոստիկանության Շենգավիթի բաժնի օպերատիվ խումբը և ՀՀ Արտակարգ իրավիճակների նախարարության փրկարար ծառայության ճգնաժամային կառավարման ազգային կենտրոնի օպերատիվ խումբը։
Փրկարարները ջրից դուրս են բերել մոտ 25 տարեկան տղամարդու դի։
Ինչպես հայտնում է
shamshyan.com կայքը, ոստիկանները, փրկարարներն ու քննիչները Երևանյան լճի ափի մոտ գտնվող փայտե կառամատույցի վրա հայտնաբերել են երիտասարդ տղայի բաճկոն, կոշիկներ, գումար, բանալիներ և այլ իրեր:
Ըստ նախնական տեղեկությունների՝ երիտասարդ տղան իրեն նետել է ջուրը, ինչի պատճառով էլ ջրահեղձ է եղել, սակայն այդ տեղեկությունը ոստիկանությունն ու քննչական բաժինը պարզում են: -0-
