Ավտոբուսում գողացել է դրամապանակ ու հաջորդ իսկ օրը բռնվել. 46–ամյա տղամարդը բերման է ենթարկվել

ԵՐԵՎԱՆ, 29 մայիսի./Նովոստի–Արմենիա/. Երևանի  կենտրոնից 46–ամյա տղամարդը բերման է ենթարկվել գրպանահատության կասկածանքով։

ՀՀ ոստիկանության մամուլի ծառայության հաղորդմամբ, մայիսի 24-ին, ժամը 21.20-ին, ոստիկանության Կենտրոնական բաժին էր զանգահարել 23-ամյա քաղաքացուհի և հայտնել, որ նույն օրը, ժամը 19.50-ին, Տիգրան Մեծի պողոտայում նկատել է, որ թիվ 75/Ա երթուղու ավտոբուսի սրահում պայուսակից գողացել են դրամապանակը, որի մեջ եղել է գումար, նույնականացման և բոնուս քարտեր:

«Մայիսի 25-ին, ժամը 17.30-ին, ոստիկանության Երևան քաղաքի վարչության գրպանահատության դեմ պայքարի բաժանմունքի ծառայողները, իրացնելով օպերատիվ տվյալները, Ամիրյան փողոցից, գողությունը կատարելու կասկածանքով, բերման են ենթարկել 1973 թ. ծնված Մանվել Խ.-ին, որը տվել է խոստովանական բացատրություն: Կատարվում է քննություն», – նշվում է գերատեսչության հաղորդագրության մեջ:–0–