ԵՐԵՎԱՆ, 4 հունիսի. /Նովոստի-Արմենիա/. Նախօրեի ուշ երեկոյան ահաբեկչական հարձակումներ են տեղի ունեցել Մեծ Բրիտանիայի մայրաքաղաք Լոնդոնի միաժամանակ երեք տարբեր վայրերում՝ Լոնդոնի կամրջի վրա, Բորոու շուկայի տարածքում և Վոքսհոլլ շրջանում, հայտնում է
RFI ռուսական ծառայությունը:
Կամրջի վրա միկրոավտոբուսը քշել է բազմության վրա, որից հետո մեքենայից դուրս են եկել 3 հոգի և դանակներով հարձակվել մարդկանց վրա։ Ականատեսների վկայությամբ, տասից ավելի մարդ տուժել են դանակի հարձակումից։ Առայժմ զոհերի և վիրավորների կոնկրետ թիվը չի հաղորդվում:
Telegraph թերթը գրում է «համակարգված գրոհների» մասին: Առաջին միջադեպը կատարվել է ժամը 22-ից հետո Լոնդոնի կամրջի վրա: Մի քանի մարդ է տուժել, ականատեսների տվյալներով:
Ժամանած ոստիկանությունը տարհանել է կամրջից մեկ մղոն շառավղով գտնվող բոլոր շինություններն ու զգոսայգիները։
Բորոու շուկայի տարածքում անհայտ անձը կրկին դանակով հարձակվել է այցելուների վրա։
Վարչապետ Թերեզա Մեյը տեղեկացվել է պատահածի մասին և արդեն իսկ ստացել է օգնության առաջարկներ ԱՄՆ նախագահ Դոնալդ Թրամփի և այլ ղեկավարների կողմից:
Այս շաբաթ օրվա ահաբեկությունը երեք ամսվա ընթացքում Մեծ Բրիտանիայի երրորդ ահաբեկությունն է: Նախորդ գրոհները կատարվել են մարտի 22-ին Լոնդոնի խորհրդարանի շենքի մոտ, որտեղ զոհվել է 5 մարդ և ապրիլի 22-ին, երբ Մանչեսթերում համերգի ժամանակ զոհվել է 22 մարդ:-0-