Զինված հանցավոր խմբի գործով կալանավորվածը հացադուլ է հայտարարել. Արդարադատության նախարարություն

ԵՐԵՎԱՆ, 17 փետրվարի. /Նովոստի–Արմենիա/. Զինված հանցավոր խմբի գործով կալանավորված Աղասի Մարտիրոսյանը հացադուլ է հայտարարել և հետազոտման համար տեղափոխվել է քաղաքացիական հիվանդանոց, հայտնեցին ՀՀ արդարադատության նախարարության քրեակատարողական հիմնարկների վարչության մամուլի ծառայությունից:

Համաձայն հաղորդման, Մարտիրոսյանը հացադուլ է հայտարարել երկուշաբթի օրվանից: Նա իր մեղքը չի ընդունում և հրաժարվում է ցուցմունք տալ:

ԱԱԾ–ի տարբեր ստորաբաժանումների ձեռնարկած համատեղ միջոցառումների ընթացքում նոյեմբերի 25-ին  հաջողվել է բացահայտել և վնասազերծել հանցավոր խումբ, որն իր զինվածության մակարդակով, անդամների քանակով, կազմակերպվածությամբ, ինչպես նաև պատրաստվող գործողությունների վտանգավորությամբ ըստ էության նախադեպը չի ունեցել Հայաստանի Հանրապետության տարածքում:

Հանցախումբը ծրագրել է հանցագործություններ (այդ թվում սպանություններ) առանձին քաղաքացիների, պետական և քաղաքական գործիչների, ինչպես նաև իշխանության որոշ օղակների և մարմինների դեմ։

Գործի շրջանակում ձերբակալվել է ավելի քան 30 հոգի: 2015 թվականի դեկտեմբերի 19-ին ձերբակալվել էր նախկին պաշտպանության փոխնախարար Վահան Շիրխանյանը, իսկ 2016 թվականի հունվարի 16-ին «Հայրենիք և պատիվ» կուսակցության նախագահ Գառնիկ Մկրտչյանը: Ձերբակալվածներից մոտ 10 հոգի հետագայում ազատ են արձակվել:-0-